* ملحوظة : هذه التدوينة ليست بغرض الإمتاع .. بس حاول تقرأها للآخر .. يمكن يمكن تستفيد *
اه عارف اني استخدمت الصورة نفسها مرتين :')
سؤال بيتبادر لذهني كتير جدا .. يعني إيه مغيب ؟
الكلمة دي بقت بتتقال كتير .. إنت مغيب .. الي ف التحرير مغيبين .. الشباب مغيب .. الشعب مغيب .. المسلمين مغيبين .. قلت لنفسي كده أول ما صحيت من النوم .. يوم تاني فاضي مبعملش في حاجة مهمة تذكر .. يمكن قاعد طول النهار باصص ف السقف وبفكر ف حاجات ملهاش لزمة .. او ليها لزمة بس انا مش عارف .. يمكن احتاجها بعد كده .. أقوم أعمل كوباية شاي .. تطلع وحشة واكبها واعمل واحدة تانية .. الفراغ بيقتلني .. مُغيب .. خلصت كوباية الشاي .. شوية مذاكرة وحفظ حاجات ملهاش لزمة .. مُغيب .. يعني إيه ؟
في ملل شديد فتحت المعجم اشوف معنى الكلمة أصلا ايه عشان اخلص من الهواجس دي واعرف اذاكر كلمتين على بعض .. " رَجُلٌ مُغَيَّبٌ " : أَيْ أُبْعِدَ وتَمَّ تَغْيِيبُهُ .. حاولت استرجع موقف اتقالي فيه يا مغيب .. زمان لما كنت بتناقش مع عمو الفلاني في السياسة .. الكبير الي بيفهم .. لما كان بيتكلم بمنتهى الهدوء وفجأة قعد يزعق : " إنتوا مش فاهمين حاجة .. شوية مغفلين ماشيين ورا مغفل كبير .. فين خبرتكوا في الحياة ؟ فين معلوماتكوا ؟ فين الي قريتوه ؟ .. بتتبعوا اي موضة ماشية وخلاص ؟ كلكوا أصلا أخلاقكوا زبالة وبتعملوش حاجة من الي انتوا بتطالبوا الناس بيها .. إنتوا مغيبين ومبتفكروش و أنا افهم عنكوا مليون مرة .. " مع إني كنت هادي بردك وبتكلم بمنطق وعقلانية .. بس بردو حتى لو إحنا خلاقنا زبالة ومش فاهمين حاجة فين التغييب ف كده ؟ طب هو عرف منين طيب إن معندناش خبرة ف الحياة ؟ حدد ده على أساس ايه ؟ عرف منين إن إحنا مش بنفكر ؟ وعرف منين إن إحنا بنثور عشان نتبع التيار وخلاص ؟
- لعلك _ عزيزي القارئ _ تتفق معي أن هذا المدعو عمو الفلاني هو الي راجل مغيب فعلا .. عايش ف نظرية المؤامرة .. مبيفترضش حسن النية .. بيفرض كلام من دماغه ويبني النتايج على اساس الفروض دي .. عمو الفلاني هو مجرد متعصب ضيق الأفق رافض لفكرة إنه ممكن يكون غلط وإن غيره يبقى صح .. .
- لعلك _ عزيزي القارئ _ تتفق معي أن هذا المدعو عمو الفلاني هو بني آدم منغلق الدماغ فاشي الفكر ولا يصلح كلامه لإننا ناخده على محمل الجد أو إننا نلقي له بالا أصلا ..
- لعلك _ عزيزي القارئ _ تتفق معي إن عمو الفلاني بيعمم زيادة عن اللزوم .. وبيجمع الحديث عن ناس كتير هو ميعرفش منهم أكتر من خمسة ستة وميعرفهمش كويس .
- لعلك _ عزيزي القارئ _ تتفق معي إن عمو الفلاني ليه مصلحة شخصية ما باظت بقيام الثورة .. كان في حاجة مصبراه على كل حاجة وحشة ف البلد .. شهوة شخصية النظام بيرضيهاله فبيفضلّه على إنه يشجع الثورة ويفكر فـ الي حواليه ..
- لعلك _ عزيزي القارئ _ متكونش زهقت مني وتستحملني شوية وتكمل قراية بس يا ريت تحدد الأول إنت متفق معايا ف الكلام الي فوق ولا متفق مع عمو الفلاني .. لأن ده هيفرق :D
----
يحضرني موقف أخر إتوجهتلي في نفس الإتهامات السابقة .. كنت بتناقش ف أمور تخص الدين والخلق مع شخص آخر .. وبعد حوار طويل بدأ يقول بردو :
" إنتوا مش فاهمين حاجة .. شوية مغفلين ماشيين ورا مغفل كبير .. فين خبرتكوا في الحياة ؟ فين معلوماتكوا ؟ فين الي قريتوه ؟ .. بتتبعوا اي موضة ماشية وخلاص ؟ كلكوا أصلا أخلاقكوا زبالة وبتعملوش حاجة من الي انتوا بتطالبوا الناس بيها .. إنتوا مغيبين ومبتفكروش و أنا افهم عنكوا مليون مرة .. "
بغض النظر إنه بيفرض كلامه من دماغه ويبني عليه النتايج .. هذا الشخص بيطلب مني إني اقُر بإن أنا غلط وهو صح لمجرد إني مبقاش مولود كده أو مبقاش متعصب لفكرة معينة .. وعشان مبقاش متعصب لفكرة معينة لازم اتعصب للفكرة التانية .. هذا الشخص بيفترض إني بتبع موضة .. هذا الشخص بيفترض ان هو بس الي فكر .. وان انا مفكرتش .. واني محتاجله حاجة ماسة عشان يوضحلي ده ويعرفني إزاي أفكر واوصل بحيادية تامة وبموضوعية خالصة للإختيار العبقري الي هو إختاره ..
هذا الشخص فعلا عبقري .. وانا فعلا مغيب .. فعلا .
لعلك _ عزيزي القارئ _ تتفق معي إن انا مغيب وإن هذا الشخص عبقري .. ولا إيه رأيك ؟
دمتم،،
