السبت، 27 أكتوبر، 2012

انا ضحية مجتمع فاشي !

أنا ضحية مجتمع فاشي




وصف ونقض ساخر لما يحدث في المجتمع وفي الشارع المصري على لسان طالب ثانوية غلبان " بس مش غلبان اوي "  :D

وصف ونقض ساخر .. نقض ولا نقد ؟

الحقيقة معرفش هي نقض ولا نقد .. لأن إحنا طول عمرنا بنسمع وننقل .. الكلمة اساسا وصلتني بالسمع .. اكيد لما اجي اكتبها مش هتتكتب صح .. لأني مفكرتش قبل كده أسأل .. دي تعتبر أكبر مشكلة بنعاني منها كلنا .. مبنفكرش .. اه مبنفكرش .. اه والله ما بنفكر ..

تعرف ان احنا اول شعب ف العالم يعمل ثورة من غير ما يفكر ؟ فجأة كده بدون أي مقدمات او بادرات مبشرة بأي حاجة عمل ثورة ..
حتى كل حاجة ف حياتنا .. بناكل من غير ما نفكر .. بنمشي من غير ما نفكر .. مرة من يجي ست سبع تمن عشر شهور كده قفشت نفسي وانا بفكر من غير ما افكر .. زعلت اوي ..

كان في مدرس ربنا يمسيه بالخير يا رب بيقولي وانا صغير انت استاذ في تضييع الوقت .. احنا بنضيع وقت كبير جدا في عدم التفكير .. واضح ان كلنا اساتذة ف الموضوع ده ..

حالة عدم التفكير الي بيتميز بيها المواطن المصري دي حاجة حلوة ع فكرة .. عادي زي الحاجات الحلوة التانية الي عند الشعب المصري .. على سبيل المثال الحشيش .. عند الشباب المصري هو حاجة حلوة .. لأن مفيهوش بذر .. هو غلط بس حلو .. ده لو بصينا يعني لنص الكوباية المليان .. مع انها كده كده مش هتفرق لأن الكوباية فاضية ..

فلسفة عدم التفكير فلسفة سبق بيها الشعب المصري العالم كله .. لأنه قلب خطوات ومباديء التفكير العلمي او الفلسفي او ايا كان رأسا على عقب واثبت ان المشاكل ممكن تتحل من غير أي تفكير خالص .. وكمان ممكن تتحل بالحشيش الي مفيهوش بذر .

تاني اكبر مشكلة بنعاني منها اننا مبنغلطش .. خالص .. كل افعالنا منزلة من السماء ومقدسة .. مش مصدقني ؟

طب اكتب على النقط دي 3 مواقف انت غلطت فيهم لوحدك .. .. ها ؟ هي بردو غلطت ؟ طب بلاش تلاتة عاوز موقف واحد .. مفيش ؟ شوفت بقى .. احنا شعب لا يخطئ .. وعشان كده مبنتعلمش ابدأ من اخطائنا .. لأنها ببساطة غير موجودة !

( كما تلاحظ انا مش عامل نقط تكتب عليه غلطاتك لأنك مبتغلطش )

تالت اكبر مشكلة بنعاني منها اننا مش مديين للولية حقها .. اه الولية .. كلمة ولية مش كلمة وحشة دي تعتبر حاجة مميزة اصلا بتميز الست عن غيرها من الرجالة .. الست اتسمت ولية لأنها بتتولى أمر عيالها لكن الراجل مبيعملش حاجة نايم طول النهار وبالليل على القهوة فمينفعش يبقى ولية  ..  الستات دول لولا طيبتهم والله وانهم بكلمة حلوة ممكن يتاكل بعقلهم حلاوة كان زمانهم مسيطرين على العالم وبيبيعونا الطن بـ تلاتة مليم لسكان المريخ .. مش بس الولية الي مبتاخدش حقها .. أي حد ف مصر مبياخدش حقه غير من الي اقل منه .. عندنا طبقية وعنصرية رهيبة بين الرجالة والستات وبين الكبار والصغار وبين المسلمين والمسيحيين وبين الثوريين والفلول وبين كل اطياف الشعب ..


 " انا ضحية مجتمع فاشي " .. ف الاول انا كنت مفكر ان ده مصطلح مشتق من كلمة " فَشِّ " مثل " فشَّ المعلمُ غله في الولا " أو " فشَّ المعَلِم غله في الفشة " بس اتضح ان فاشي هي الصفة من الفاشية .. والفاشية " fascism " لمن لا يعلم هي مصطلح مشتق من الكلمة الايطالية " fascio " ودي كانت مجموعة صولجانات بتتحط قدام الحكام في روما عشان تدل على سلطتهم .. بعيدا عن التفاصيل المملة وتاريخ الفاشية كنظام دولة فهي اصبحت كلمة بتطلق على كل ديكتاتور او عدو للديموقراطية ..

" انا ضحية مجتمع فاشي " دي تعتبر المشكلة الرابعة الي بتكمل الـ 3 مشاكل الي في الأول  .. كل واحد فينا بيعلق خطأه وفشله دايما على المجتمع وبيعتبر نفسه الضحية .. في اعتقاده دايما ان لولا الناس الي حواليه كان زمانه عمل كذا وكذا .. لولا ان ليه اخوات كان زمانه عامل كذا وكذا .. عمره ما فكر ولو لثانية ان ممكن المشكلة تكون فيه هو .. الواحد مننا لو كان في يوم ضحية فهو ضحية غبائه .. لأنه مقدرش يحس حتى فين المشكلة .. ماهو مبيغلطش بقى !

احساس المواطن المصري دايما انه ضحية ولد عنده عقدة .. بقى عاوز يثبت انه صح بأي طريقة .. حتى لو هو غلط وهو عارف انه غلط بيبقى عاوز يثبت أنه صح ..

المجتمع المصري من وجهة نظري المتواضعة مجتمع فاشي فشا السنين .. الفاشية تجري في دمه زي ما بتجري الكريات البيضة والحمرا وكده .. وتزايد الامر عن الحد المعقول بعد التلاتين سنة بتوع حسني مبارك ربنا ما يمسيه بالخير لو كان لسا عايش .. المجتمع إتحول لغابة والبقاء للأكثر فسادا والأكثر ديكتاتورية .. كل واحد جواه ديكتاتور صغير بيفرض رأيه على الي أقل منه ..

طبقات المجتمع المادية البقاء فيها للأغنى .. والوظيفية البقاء فيها للأعلى مرتبة .. والسنية البقاء فيها للأكبر ..والتعليمية البقاء فيها للأكثر دحاَ .. والفنية البقاء فيها للأكثر جمالا ... إلخ .

في حقيقة الأمر ان كل واحد بيعمل اي حاجة مش بيعملها عشان هي صح او عشان هي غلط .. مش بيعملها لله وللوطن .. بيعملها عشان هي متاحة ويعرف يعملها .. او عشان هي مش متاحة وبردو يعرف يعملها .. مبيفكرش اساسا .. حتى الي بيقول حاجة .. مش بيقولها عشان هي صح او غلط .. بيقولها عشان يعرف يقولها .. غلاسة كده .. لا وكمان بيحاولوا يفرضوا وجهات نظرهم الي هما اساسا مفكروش فيها وقالوها كده وخلاص على الناس .. ولو فكروا فيها هيعرفوا انها غلط ويتكسفوا منها :|

عاوز اقول لأي حد ، قبل ما تعمل اي حاجة فكّر .. قبل ما تقول اي حاجة فكر .. سايق عليك النبي فكّر .. وحيات كل عزيز وغالي عندك .. ورحمة كل ميتينك .. فكّر .. عشان هتتحاسب .. عشان في رب هيسألك على كل حاجة عملتها .. وعشان في بني آدمين كلامك الي بتقوله من غير أي مجهود بيفرق ف حياتهم وموتهم .. عشان الكلام مش لعبة .. عشان منبقاش ضحية مجتمع فاشي :|


Share/Bookmark

الجمعة، 5 أكتوبر، 2012

عثمانيات ، سبعة :D



لو في حاجة مش غلط ومش عيب وانت بتتكسف تعملها قدام الناس او بتحس باحراج فاعرف انك من جواك مش حر بالكامل وإنك بتجزأ مبادئك .
في ناس مثلا بيتكسفوا يمشوا ف الشارع مع حد اطول او اقصر منهم او يمشوا في الشارع ياكلوا او يلعبوا ، مع انه عادي ومحدش هيقولهم بتعملوا ايه ؟
في ناس بتتكلم على البني آدمين وتجيب ف سيرتهم لكن قدامهم بيسكتوا ، لما تعوز تقول لحد حاجة قولهالوا في وشه واديله حق الرد عليك . 
مفيش اي مبرر يخليك تتكسف من حاجة ربنا خلقها فيك او حاجة انت بتحبها ، واجه العالم بنفسك والي ميتقبلكش زي ما انت هو الخسران . 
رضا الناس غاية لا تدرك .. او بمعنى اصح .. رضا الناس حاجة بنت ستين كلب ملهاش لزمة . 
متسمحش لحد يتريأ عليك ، على لونك على شعرك على طولك على وشك على صوتك على ضحكك على اي حاجة ، انت ربنا خلقك في احسن تقويم .
لما حد يشتمك اعرف ان المشكلة فيه هو مش فيك ، واحد مثلا قالك يا ابن الكلب ، انت ابن كلب ؟ لا ؟ خلاص مدايق ليه ؟ :D 
متعملش مشاكل من حاجات ممكن تستغلها لصالحك ، لما حد يغلط فيك سامحه ومفيش مانع لو رحت اعتذرتله انت ، طالما هتكسبه صديق بعد كده ! 
مهما كانت مبادئك راسخة الوحش اسهل من الكويس والشيطان ابن لعيبة ، فابعد عن كل حاجة ممكن تجرك لسكة غلط  :D 
متنفتحش على الناس اكتر من اللازم واعمل حساب انك هتسيبهم وهتسيب الدنيا دي ف الآخر ، انفتح على ربنا احسنلك، الناس بتموت بس ربنا مبيموتش ! 
متخليش في حاجة ف حياتك متعرفش تعمل غير وانت لوحدك لأنك عمرك ما هتبقى لوحدك .. ربنا موجود في كل مكان وكل زمان 
" إعمل لدنياك كأنك تعيش آبدا ، وإعمل لآخرتك كأنك تموت غدا " 
متخليش في معاملتك للناس اي فرق ، عامل كل الناس بأحسن طريقة ممكن تعاملهم بيها 
خلي مقاييسك أعلى من الماديات والحالات الإجتماعية والحاجات الي مبتثبتش ، عامل الناس بروحهم وبفكرهم وبدماغهم بس . 



Share/Bookmark
rss