الجمعة، 25 نوفمبر، 2011

قصيدة مسيّلة للدموع ( بلا قافية )

أنا إتخنقت أوي من الناس بتوع عجلة الإستقرار الي عاويزنها تلف ..

مفيش على لسانهم غير خربتوا البلد ..

مبارك ده ظالم .. إنتوا خربتوا البلد ..
عاوزينوا يمشي .. إنتوا خربتوا البلد ..
مبارك مشى :D .. إنتوا خربتوا البلد ..
لا في الإستفتاء .. إنتوا خربتوا البلد ..
أه في الإستفتاء .. إنتوا خربتوا البلد ..
عاوزين رئيس .. إنتوا خربتوا البلد ..
متموتوش الناس .. إنتوا خربتوا البلد ..

وإسطوانة بقى إحنا خسرنا مش عارف إيه وإيه اتقفل وإيه متقفلش .. ومصر هتفلس في ربع ساعة وجراندايزر في الميدان والهبل ده !!

انا وانا قاعد في الحمام لوحدي بسمع صوت بيقولي ( إنت خربت البلد .. إنت خربت البلد .. إنت خربت البلد _ ضحكة شريرة _ ! )


أنا كتبت لهم القصيدة دي ..
وده كل ما جادت به القريحة من أفكار ( جتك نيلة يا قريحة دايما كاسفانا كده :D )
قصيدة مسيلة للدموع ( بلا قافية )

قصيدة مسيلة للدموع ..
ومش عامل فيها قافية ..

عشان غلط ..
يبقى الكلام هو الدروع ..
وبيتقتل ..
وبيترمي ..
بقنابل الغاز المميت ..
المسيّل للدموع ..

وأنا قاعد قال ايه يا حلولي .. 
كالأهبلِ يبحثُ عن قافية !
طب وهتعمل إيه القافية ؟!

أقسم بالله .. ملهاش لزمة ..
هتخلي القصيدة تستقر ؟!
ولا هتدور عجلة التنمية .. التنمية في الشعر ..
ويفيد بإيه الإستقرار ؟!

والكلمة مذلولة ،،
وبتتقتل وبتترمي في اكوام زبالة ..
وبتقع منها نقط .. 
وبتتفقع فيها نقط ..
ملعون أبو الإستقرار ..
ملعون أبوها القافية ..

قصيدة  مسيلة للدموع ..
ملهاش وزن ..
عشان مينفعش الكلام ..
يبقى طالع بإنكسار ..
يبقى نص الثورة تمت ...
والنص التاني ؟!
التحية لخير أجناد الأرض .. التتار !

وتقولي وزن ؟!
جرا إيه يا عم ..
ما تلم نفسك وإخفى من وشي الساعة دي ..
قال وزن قال ..
قال قافية قال ..
قال أمن قال ..


عجبتك ؟! :) معجبتكش ؟! :(
إعمل كومنت بردو ( إلا لو إنت فلول مش عاوز من شكلك حاجة :)

دمتم ،،

ملحوظة مهمة آخر ستمية وسبعين حاجة : أنا متعمد إن التدوينة مش منظمة عشان أنوه لإن النظام والإستقرار مش مهم طول ما مفيش حرية :)
وللي مش فاهم فكرة القصيدة ..
القصيدة معمولة بطريقة غير منظمة من غير اي قافية او وزن او مظاهر جمالية إحتجاجاً على كلام المجلس العسكري وفلول الحزب الوطني وبعض الناس الي بتقول إخلوا الميدان البلد بتضيع ...
لا البلد مش بتضيع ولا حاجة إنتوا بس بتستهبلوا :)

Share/Bookmark

الثلاثاء، 22 نوفمبر، 2011

لو الوريث إتسجن .. في غيره ألف وريث !

أنا كتبت جزء من القصيدة دي يوم 28 يناير .. والجزء التاني النهاردة :)


ماتت قلوب الناس
دورت ع الإحساس
فلقيته في العنبر
مقفول عليه بترباس
وعسكري ع الباب
بيأرمل العزاب
بيخلي كل الناس
تتمنى تبقى كلاب
وكلابها مسعورة
متصورين صورة
بياكلوا في لحمة بشر 
مش جنبها فاتورة
وفاتورة الثورة
ماضي عليه الجيش
دول نفذوا مؤامرة
ياكلوا بإيديها العيش
وإحنا نموت م الجوع 
أه يا عسكري مفجوع
وهمتنا إنك بتاعنا 
وإنت اساس بتوع
أسفين يا عم الرئيس
ياخي يشقفك أتوبيس
طالع على المزرعة
يقفلها بالترابيس
كل أما شعب يثور
تسرق يا خيّ النور
عاوز تكون الملك ؟!
الشعب مش زنبرك
يعد يقول يسقط
بعدين معاك يشترك
في مخطط التوريث ..
إحنا بقى المواريث ؟!
بدماغنا دي يا بشر
لو الوريث إتسجن 
فيه غيره تاني وريث
ولو والريث إتسجن 
يورثنا ألف وريث ،
دمتم ،،


Share/Bookmark

الاثنين، 21 نوفمبر، 2011

بأمارة إيه فيه تغيير ؟!



من يوم 11 فبراير وبتوع حزب الكنبة الي شايفين البلد واقفة عمالين يقولوا ارجعوا بيوتكوا ارجعوا بيوتكوا ولو المطالب متححقتش ابقوا انزلوا ..

من يوم 11 فبراير والناس دي مش على بقها غغير كفاية وخربتوا البلد ..
على أساس يعني إننا كنا عايشين في دبي ولا عايشين في لندن ..
ما الحال زي ما هو .. مهبب بنيلة ..
مفيش اي نوع من أنواع التغيير ..
بأمارة إيه فيه تغيير ..
بأمارة إيه فيه تغيير ؟!



كتبها عمرو أبو سمرة بتاريخ 17 نوفمبر :)http://www.facebook.com/Dr.AmrAboSamra




Share/Bookmark

إقتلني أسهل !


اقتلني أسهل
في وسط الأحداث المؤسفة الي في مصر دلوقتي ( الي أنا مؤيد ليها :) دايقني أوي القمع الي بيحصل ضد المتظاهرين في الميدان ..
والي مسيره ينتهي ..
لكن القمع الي موجود بيننا وفينا .. مش هينتهي أبدا إلا بوقفة يقفها كل واحد مع نفسه ..
القمع الفكري !!
كل واحد ليه وجهة نظر بيعتبر أي حاجة مخالفة ليها شرك بالله ،، وكأنه مثلا معصوم عن الخطأ ..
التدوينة عن الإختلاف .. عنوانها " إقتلني أسهل "
كتبها : " أحمد السليط " :)


Share/Bookmark

ثورة ثورة يا قاع الهامور !! ( إقتلوا سبونج بوب ! )

تدوينة جديدة .. مش بتتكلم عن الثورة المصرية في إطار ساخر .. مش هتتريأ ع الجيش .. مش بتقول عن الرئيس مبارك حاجة وحشة .. 
أو ببساطة .. هتعمل كل ده !



قاع الهامور للي مش عارف : المدينة الي بيعيش فيها سبونج بوب (bikini bottom) ..
وبالنسبة للي مش عارف سبونج بوب ..
 إنت مكنتش طفل ولا إيه !
اهو سبونج في الصورة تحت :)



لو عاوز تعرف الحوار ده كله ؟! أكمل قراءة التدوينة :)

Share/Bookmark
rss