السبت، 22 فبراير، 2014

بره وجوه النضارة!

دايما مختلفة الصورة..
جوه النضارة وبره..
وطالما إختلفت مرة..
يبقى هتخلف مليون..
مين طيب يقدر يثبت؟
إن الصورة الي شايفها
هي الي اتشافت صح؟
أو إن حقيقة عارفها
هي الي اتعرفت صح؟
وإنه ماهوَّاش مجنون!
في الكون مية ألف مجرة..
متخلقوش علشان حد
بص عليهم مية مرة..
هتشوف فيهم مية صورة..
فـ هتعرف إن الصح..
إن مفيش حاجة حقيقة..
وإن مفيش فكرة بريئة..
مش بتزيّف في الصورة..
وإن مفيش عين بتشوف..
جوه المشهد من بره..
أو برَّاه من جُوَّاه..
وطالما اختلف المشهد.. 
جوه النضارة وبره..
يبقى هيخلف مية مرة
مع كل عنين شايفاه!

Share/Bookmark
rss