الجمعة، 28 ديسمبر، 2012

مُغيب ؟

* ملحوظة : هذه التدوينة ليست بغرض الإمتاع .. بس حاول تقرأها للآخر .. يمكن يمكن تستفيد *

اه عارف اني استخدمت الصورة نفسها مرتين :')

سؤال بيتبادر لذهني كتير جدا .. يعني إيه مغيب ؟
الكلمة دي بقت بتتقال كتير .. إنت مغيب .. الي ف التحرير مغيبين .. الشباب مغيب .. الشعب مغيب .. المسلمين مغيبين .. قلت لنفسي كده أول ما صحيت من النوم .. يوم تاني فاضي مبعملش في حاجة مهمة تذكر .. يمكن قاعد طول النهار باصص ف السقف وبفكر ف حاجات ملهاش لزمة .. او ليها لزمة بس انا مش عارف .. يمكن احتاجها بعد كده .. أقوم أعمل كوباية شاي .. تطلع وحشة واكبها واعمل واحدة تانية .. الفراغ بيقتلني .. مُغيب .. خلصت كوباية الشاي .. شوية مذاكرة وحفظ حاجات ملهاش لزمة .. مُغيب .. يعني إيه ؟

في ملل شديد فتحت المعجم اشوف معنى الكلمة أصلا ايه عشان اخلص من الهواجس دي واعرف اذاكر كلمتين على بعض .. " رَجُلٌ مُغَيَّبٌ " : أَيْ أُبْعِدَ وتَمَّ تَغْيِيبُهُ .. حاولت استرجع موقف اتقالي فيه يا مغيب .. زمان لما كنت بتناقش مع عمو الفلاني في السياسة .. الكبير الي بيفهم .. لما كان بيتكلم بمنتهى الهدوء وفجأة قعد يزعق : " إنتوا مش فاهمين حاجة .. شوية مغفلين ماشيين ورا مغفل كبير .. فين خبرتكوا في الحياة ؟ فين معلوماتكوا ؟ فين الي قريتوه ؟ .. بتتبعوا اي موضة ماشية وخلاص ؟ كلكوا أصلا أخلاقكوا زبالة وبتعملوش حاجة من الي انتوا بتطالبوا الناس بيها .. إنتوا مغيبين ومبتفكروش و أنا افهم عنكوا مليون مرة .. " مع إني كنت هادي بردك وبتكلم بمنطق وعقلانية .. بس بردو حتى لو إحنا خلاقنا زبالة ومش فاهمين حاجة فين التغييب ف كده ؟ طب هو عرف منين طيب إن معندناش خبرة ف الحياة ؟ حدد ده على أساس ايه ؟ عرف منين إن إحنا مش بنفكر ؟ وعرف منين إن إحنا بنثور عشان نتبع التيار وخلاص ؟ 

- لعلك _ عزيزي القارئ _ تتفق معي أن هذا المدعو عمو الفلاني هو الي راجل مغيب فعلا .. عايش ف نظرية المؤامرة .. مبيفترضش حسن النية .. بيفرض كلام من دماغه ويبني النتايج على اساس الفروض دي .. عمو الفلاني هو مجرد متعصب ضيق الأفق رافض لفكرة إنه ممكن يكون غلط وإن غيره يبقى صح ..  .

- لعلك _ عزيزي القارئ _ تتفق معي أن هذا المدعو عمو الفلاني هو بني آدم منغلق الدماغ فاشي الفكر ولا يصلح كلامه لإننا ناخده على محمل الجد أو إننا نلقي له بالا أصلا ..

- لعلك _ عزيزي القارئ _ تتفق معي إن عمو الفلاني بيعمم زيادة عن اللزوم .. وبيجمع الحديث عن ناس كتير هو ميعرفش منهم أكتر من خمسة ستة وميعرفهمش كويس .

- لعلك _ عزيزي القارئ _ تتفق معي إن عمو الفلاني ليه مصلحة شخصية ما باظت بقيام الثورة .. كان في حاجة مصبراه على كل حاجة وحشة ف البلد .. شهوة شخصية النظام بيرضيهاله فبيفضلّه على إنه يشجع الثورة ويفكر فـ الي حواليه ..

- لعلك _ عزيزي القارئ _ متكونش زهقت مني وتستحملني شوية وتكمل قراية بس يا ريت تحدد الأول إنت متفق معايا ف الكلام الي فوق ولا متفق مع عمو الفلاني .. لأن ده هيفرق :D

----
يحضرني موقف أخر إتوجهتلي في نفس الإتهامات السابقة .. كنت بتناقش ف أمور تخص الدين والخلق مع شخص آخر .. وبعد حوار طويل بدأ يقول بردو :
 " إنتوا مش فاهمين حاجة .. شوية مغفلين ماشيين ورا مغفل كبير .. فين خبرتكوا في الحياة ؟ فين معلوماتكوا ؟ فين الي قريتوه ؟ .. بتتبعوا اي موضة ماشية وخلاص ؟ كلكوا أصلا أخلاقكوا زبالة وبتعملوش حاجة من الي انتوا بتطالبوا الناس بيها .. إنتوا مغيبين ومبتفكروش و أنا افهم عنكوا مليون مرة .. " 

 بغض النظر إنه بيفرض كلامه من دماغه ويبني عليه النتايج .. هذا الشخص بيطلب مني إني اقُر بإن أنا غلط وهو صح لمجرد إني مبقاش مولود كده أو مبقاش متعصب لفكرة معينة .. وعشان مبقاش متعصب لفكرة معينة لازم اتعصب للفكرة التانية .. هذا الشخص بيفترض إني بتبع موضة .. هذا الشخص بيفترض ان هو بس الي فكر .. وان انا مفكرتش .. واني محتاجله حاجة ماسة عشان يوضحلي ده ويعرفني إزاي أفكر واوصل بحيادية تامة وبموضوعية خالصة للإختيار العبقري الي هو إختاره ..
هذا الشخص فعلا عبقري .. وانا فعلا مغيب .. فعلا .

لعلك _ عزيزي القارئ _ تتفق معي إن انا مغيب وإن هذا الشخص عبقري .. ولا إيه رأيك ؟

دمتم،،


Share/Bookmark

السبت، 27 أكتوبر، 2012

انا ضحية مجتمع فاشي !

أنا ضحية مجتمع فاشي




وصف ونقض ساخر لما يحدث في المجتمع وفي الشارع المصري على لسان طالب ثانوية غلبان " بس مش غلبان اوي "  :D

وصف ونقض ساخر .. نقض ولا نقد ؟

الحقيقة معرفش هي نقض ولا نقد .. لأن إحنا طول عمرنا بنسمع وننقل .. الكلمة اساسا وصلتني بالسمع .. اكيد لما اجي اكتبها مش هتتكتب صح .. لأني مفكرتش قبل كده أسأل .. دي تعتبر أكبر مشكلة بنعاني منها كلنا .. مبنفكرش .. اه مبنفكرش .. اه والله ما بنفكر ..

تعرف ان احنا اول شعب ف العالم يعمل ثورة من غير ما يفكر ؟ فجأة كده بدون أي مقدمات او بادرات مبشرة بأي حاجة عمل ثورة ..
حتى كل حاجة ف حياتنا .. بناكل من غير ما نفكر .. بنمشي من غير ما نفكر .. مرة من يجي ست سبع تمن عشر شهور كده قفشت نفسي وانا بفكر من غير ما افكر .. زعلت اوي ..

كان في مدرس ربنا يمسيه بالخير يا رب بيقولي وانا صغير انت استاذ في تضييع الوقت .. احنا بنضيع وقت كبير جدا في عدم التفكير .. واضح ان كلنا اساتذة ف الموضوع ده ..

حالة عدم التفكير الي بيتميز بيها المواطن المصري دي حاجة حلوة ع فكرة .. عادي زي الحاجات الحلوة التانية الي عند الشعب المصري .. على سبيل المثال الحشيش .. عند الشباب المصري هو حاجة حلوة .. لأن مفيهوش بذر .. هو غلط بس حلو .. ده لو بصينا يعني لنص الكوباية المليان .. مع انها كده كده مش هتفرق لأن الكوباية فاضية ..

فلسفة عدم التفكير فلسفة سبق بيها الشعب المصري العالم كله .. لأنه قلب خطوات ومباديء التفكير العلمي او الفلسفي او ايا كان رأسا على عقب واثبت ان المشاكل ممكن تتحل من غير أي تفكير خالص .. وكمان ممكن تتحل بالحشيش الي مفيهوش بذر .

تاني اكبر مشكلة بنعاني منها اننا مبنغلطش .. خالص .. كل افعالنا منزلة من السماء ومقدسة .. مش مصدقني ؟

طب اكتب على النقط دي 3 مواقف انت غلطت فيهم لوحدك .. .. ها ؟ هي بردو غلطت ؟ طب بلاش تلاتة عاوز موقف واحد .. مفيش ؟ شوفت بقى .. احنا شعب لا يخطئ .. وعشان كده مبنتعلمش ابدأ من اخطائنا .. لأنها ببساطة غير موجودة !

( كما تلاحظ انا مش عامل نقط تكتب عليه غلطاتك لأنك مبتغلطش )

تالت اكبر مشكلة بنعاني منها اننا مش مديين للولية حقها .. اه الولية .. كلمة ولية مش كلمة وحشة دي تعتبر حاجة مميزة اصلا بتميز الست عن غيرها من الرجالة .. الست اتسمت ولية لأنها بتتولى أمر عيالها لكن الراجل مبيعملش حاجة نايم طول النهار وبالليل على القهوة فمينفعش يبقى ولية  ..  الستات دول لولا طيبتهم والله وانهم بكلمة حلوة ممكن يتاكل بعقلهم حلاوة كان زمانهم مسيطرين على العالم وبيبيعونا الطن بـ تلاتة مليم لسكان المريخ .. مش بس الولية الي مبتاخدش حقها .. أي حد ف مصر مبياخدش حقه غير من الي اقل منه .. عندنا طبقية وعنصرية رهيبة بين الرجالة والستات وبين الكبار والصغار وبين المسلمين والمسيحيين وبين الثوريين والفلول وبين كل اطياف الشعب ..


 " انا ضحية مجتمع فاشي " .. ف الاول انا كنت مفكر ان ده مصطلح مشتق من كلمة " فَشِّ " مثل " فشَّ المعلمُ غله في الولا " أو " فشَّ المعَلِم غله في الفشة " بس اتضح ان فاشي هي الصفة من الفاشية .. والفاشية " fascism " لمن لا يعلم هي مصطلح مشتق من الكلمة الايطالية " fascio " ودي كانت مجموعة صولجانات بتتحط قدام الحكام في روما عشان تدل على سلطتهم .. بعيدا عن التفاصيل المملة وتاريخ الفاشية كنظام دولة فهي اصبحت كلمة بتطلق على كل ديكتاتور او عدو للديموقراطية ..

" انا ضحية مجتمع فاشي " دي تعتبر المشكلة الرابعة الي بتكمل الـ 3 مشاكل الي في الأول  .. كل واحد فينا بيعلق خطأه وفشله دايما على المجتمع وبيعتبر نفسه الضحية .. في اعتقاده دايما ان لولا الناس الي حواليه كان زمانه عمل كذا وكذا .. لولا ان ليه اخوات كان زمانه عامل كذا وكذا .. عمره ما فكر ولو لثانية ان ممكن المشكلة تكون فيه هو .. الواحد مننا لو كان في يوم ضحية فهو ضحية غبائه .. لأنه مقدرش يحس حتى فين المشكلة .. ماهو مبيغلطش بقى !

احساس المواطن المصري دايما انه ضحية ولد عنده عقدة .. بقى عاوز يثبت انه صح بأي طريقة .. حتى لو هو غلط وهو عارف انه غلط بيبقى عاوز يثبت أنه صح ..

المجتمع المصري من وجهة نظري المتواضعة مجتمع فاشي فشا السنين .. الفاشية تجري في دمه زي ما بتجري الكريات البيضة والحمرا وكده .. وتزايد الامر عن الحد المعقول بعد التلاتين سنة بتوع حسني مبارك ربنا ما يمسيه بالخير لو كان لسا عايش .. المجتمع إتحول لغابة والبقاء للأكثر فسادا والأكثر ديكتاتورية .. كل واحد جواه ديكتاتور صغير بيفرض رأيه على الي أقل منه ..

طبقات المجتمع المادية البقاء فيها للأغنى .. والوظيفية البقاء فيها للأعلى مرتبة .. والسنية البقاء فيها للأكبر ..والتعليمية البقاء فيها للأكثر دحاَ .. والفنية البقاء فيها للأكثر جمالا ... إلخ .

في حقيقة الأمر ان كل واحد بيعمل اي حاجة مش بيعملها عشان هي صح او عشان هي غلط .. مش بيعملها لله وللوطن .. بيعملها عشان هي متاحة ويعرف يعملها .. او عشان هي مش متاحة وبردو يعرف يعملها .. مبيفكرش اساسا .. حتى الي بيقول حاجة .. مش بيقولها عشان هي صح او غلط .. بيقولها عشان يعرف يقولها .. غلاسة كده .. لا وكمان بيحاولوا يفرضوا وجهات نظرهم الي هما اساسا مفكروش فيها وقالوها كده وخلاص على الناس .. ولو فكروا فيها هيعرفوا انها غلط ويتكسفوا منها :|

عاوز اقول لأي حد ، قبل ما تعمل اي حاجة فكّر .. قبل ما تقول اي حاجة فكر .. سايق عليك النبي فكّر .. وحيات كل عزيز وغالي عندك .. ورحمة كل ميتينك .. فكّر .. عشان هتتحاسب .. عشان في رب هيسألك على كل حاجة عملتها .. وعشان في بني آدمين كلامك الي بتقوله من غير أي مجهود بيفرق ف حياتهم وموتهم .. عشان الكلام مش لعبة .. عشان منبقاش ضحية مجتمع فاشي :|


Share/Bookmark

الجمعة، 5 أكتوبر، 2012

عثمانيات ، سبعة :D



لو في حاجة مش غلط ومش عيب وانت بتتكسف تعملها قدام الناس او بتحس باحراج فاعرف انك من جواك مش حر بالكامل وإنك بتجزأ مبادئك .
في ناس مثلا بيتكسفوا يمشوا ف الشارع مع حد اطول او اقصر منهم او يمشوا في الشارع ياكلوا او يلعبوا ، مع انه عادي ومحدش هيقولهم بتعملوا ايه ؟
في ناس بتتكلم على البني آدمين وتجيب ف سيرتهم لكن قدامهم بيسكتوا ، لما تعوز تقول لحد حاجة قولهالوا في وشه واديله حق الرد عليك . 
مفيش اي مبرر يخليك تتكسف من حاجة ربنا خلقها فيك او حاجة انت بتحبها ، واجه العالم بنفسك والي ميتقبلكش زي ما انت هو الخسران . 
رضا الناس غاية لا تدرك .. او بمعنى اصح .. رضا الناس حاجة بنت ستين كلب ملهاش لزمة . 
متسمحش لحد يتريأ عليك ، على لونك على شعرك على طولك على وشك على صوتك على ضحكك على اي حاجة ، انت ربنا خلقك في احسن تقويم .
لما حد يشتمك اعرف ان المشكلة فيه هو مش فيك ، واحد مثلا قالك يا ابن الكلب ، انت ابن كلب ؟ لا ؟ خلاص مدايق ليه ؟ :D 
متعملش مشاكل من حاجات ممكن تستغلها لصالحك ، لما حد يغلط فيك سامحه ومفيش مانع لو رحت اعتذرتله انت ، طالما هتكسبه صديق بعد كده ! 
مهما كانت مبادئك راسخة الوحش اسهل من الكويس والشيطان ابن لعيبة ، فابعد عن كل حاجة ممكن تجرك لسكة غلط  :D 
متنفتحش على الناس اكتر من اللازم واعمل حساب انك هتسيبهم وهتسيب الدنيا دي ف الآخر ، انفتح على ربنا احسنلك، الناس بتموت بس ربنا مبيموتش ! 
متخليش في حاجة ف حياتك متعرفش تعمل غير وانت لوحدك لأنك عمرك ما هتبقى لوحدك .. ربنا موجود في كل مكان وكل زمان 
" إعمل لدنياك كأنك تعيش آبدا ، وإعمل لآخرتك كأنك تموت غدا " 
متخليش في معاملتك للناس اي فرق ، عامل كل الناس بأحسن طريقة ممكن تعاملهم بيها 
خلي مقاييسك أعلى من الماديات والحالات الإجتماعية والحاجات الي مبتثبتش ، عامل الناس بروحهم وبفكرهم وبدماغهم بس . 



Share/Bookmark

الأربعاء، 26 سبتمبر، 2012

بطل خارق .. إنت عندك مشكلة ؟

إنت عندك مشكلة ؟
وانا صغير كان نفسي اوي ابقى بطل خارق :D

-----------

وانا صغير كنت زي كل الأطفال من جوه .. نقي وطاهر وكده والدنيا لم تلوثني بشرورها .. وكانت متعتي الوحيدة هي الفرجة على سبيستون ..  ومرت الأيام وكبرت ونسيت كل حاجة عن طفولتي زي كل الناس ما بتنسى .

قريب كنت بقلب في التلفزيون فلقيت سبيستون تاني .. حسيت بحنين كده وقعدت اتفرج شوية .. وقعدت افتكر بقى أيام الطفولة وأحلامي في إني أبقى بطل قومي خارق بساعد الناس على حل مشاكلهم ويبقى الناس حاطين صوري في بيتهم لأني في يوم ساعدتهم أو حليتلهم مشكلة ، وهنا جاءتني فكرة عبقرية ، لسا مفاتش الآوان إني أحقق حلمي وأبقى بطل خارق وقررت أبدأ التنفيذ فورا وقعدت مع نفسي افكر في أهم الحاجات الي هحتاجها عشان أحقق حلمي ، إيه الحاجات الي هحتاجها ؟!

-         زي خارق .
-         واحد عنده مشكلة .
-         حل للمشكلة .
-         بلالين كتير وقاعة أفراح عشان نحتفل بعد ما نحل المشكلة .

بدأت بالفعل أول خطوة وهي إحضار الزي الخارق وتوجهت نحو محل هدوم مشهور اوي وقابلني شاب كده شكله شيك وسينيه وعنده بتاع عشرين سنة وقالي أؤمر يا فندم .. انا طبعا انبسطت اول مرة حد يقولي يا فندم ورديت عليه في شياكة مصطنعة كده ووقار غير حقيقي : لو سمحت انا كنت جاي عندكوا ادور على زي بتاع بطل خارق .. قام الواد السينيه قالي وهو بيحاول يكتم ضحكته بالعافية لا يا فندم هو مش موجود
-         طب الاقيه فين ؟
-         أقولك ومتزعلش ؟
-         لا مش هزعل !
وهنا فقد الولد السينيه اعصابه وبقى مش سينيه خالص وقام طردني بره المحل .
وهنا ايضا ادركت مدى صعوبة المهمة التي انا مقدم على أداءها وكمان افتكرت إن كل الأبطال الخارقين كانوا الناس بيعاملوهم وحش في الأول لحد ما بيوروا الناس أهميتهم في هزيمة الشر وكده .

فضلت امشي امشي امشي وانا بفكر إزاي هقدر ابقى بطل خارق من غير زي خارق اواجه بيه الأشرار والجريمة وإذ فجأة وانا ماشي على كوبري كده لا داعي لذكر إسمه لقيت واحد بيبيع هدوم حيوانات وكان عنده لبس ميكي ماوس على مقاسي ، وبصراحة كان شكله ظريف يعني وبعدين عادي مهو في الرجل الوطواط والرجل العنكبوت ليه ميبقاش فيه الراجل الميكي ماوس ؟ وفعلا رحت للراجل وقلتله الطقم ده بكام وكان بتسعين جنيه ، وهنا ظهرت مشكلة جديدة .. انا مش معايا غير عشرين جنيه وهتعشى بيهم ، وخابت آمالي مرة آخرى وبعدين جت في بالي فكرة عبقرية، ليه مبقاش بطل خارق في صورة آدمية زي البني آدمين العاديين ؟

وبالفعل تم حل مشكلة الزي الخارق بإني ابقى بطل من غير زي خارق وصحيت تاني يوم الصبح بدري في أول يوم ليا في وظيفتي الجديدة ونزلت للشارع بسرعة عشان أبدأ في الخطوة التانية وهي البحث عن حد عنده مشكلة ، فضلت أمشي في الشوارع أدور على حد بيستغيث أو حد عنده مشكلة مش لاقي خالص .. وفجأة لقيت نفسي قدام محل الهدوم الكبير الي انا كنت بدور فيه على الزي امبارح ودخلته ، عملت نفسي بتفرج على الهدوم عشان محدش يشك فيا ووقفت جنب ست عجوزة كده وقلتلها بصوت واطي : إنتي عندك مشكلة يا حجة ؟
-         اها .. عندك من ده مقاس ميديام ؟
-         ميديام ايه .. انا ممكن اساعدك في حاجة اكبر من كده دي حاجة صغيرة خالص .
-         تقصد ايه ؟
-         انا ممكن احللك حاجة كبيرة .
-         انت بتشتغل هنا ؟
-         انا بشتغل في كل حتة .
-         إنت إسمك ايه يبني ؟
-         انا البطل الخارق
وقامت الست العجوزة توجهت غاضبة ناحية الإستقبال وقالت للشاب السينيه والنبي يبني لم أبطالك الخارقين لحسن مينفعش كده قلة الزوق دي وطلعت بره رازعةً وراها الباب قبل ان ينبس الواد السينيه ببنت شفة .

فدخلت مسرعا لقسم الأحذية قبل أن يراني الواد السينيه وكان في هناك راجل كبير كده بيتفرج على جزم جلدية حريمي وباينة عليه الحيرة فقررت أساعده ورحتله وقلت في أسلوب هادئ كده : حضرتك بتواجه أي مشاكل في حياتك ؟
-         حضرتك بقى حلال المشاكل ؟
-         اه طبعا ، انا ممكن احللك أي مشكلة واخلصك منها ، انا بطل خارق !
-         هاهاهاهاهاها أي مشكلة يا سي البطل الخارق ؟
-         اه .. إنت فضفض بس وقولي الي عندك وانا اساعدك
-         العيال يا سيدي والجماعة هيموتوني ، ده غير طلبات مبتنتهيش .
-         الجماعة دي سرية ؟
-         سرية ايه انت هتودينا في داهية .
-         طب بص يا فندم ، إنت هتحطلي كاميرات مراقبة عند الجماعة عشان اراقبهم واعرف الثغرة الي هنقدر نخترقهم منها وبعدين نبلغ البوليس .

وهنا تحول الرجل المحترم الكبير لحاجة كده بتزعق ومسكني من رقبتي وهو بيقولي إنت مجنون ؟ الله يخربيت الي بيشغلكوا ..
وخرج وهو يسب ويلعن في المحل وفي اصحاب المحل والأبطال الخارقين والواد السينيه ذات نفسه !

وقبل أن يدخل الواد السينيه قسم الأحذية متوعدا بالأهوال لمن يزعج زبائنه كنت انا في قسم لبس الأطفال وانا بقول في سري : " شكل الراجل ده جاسوس الجماعة باعتاه عشان تعرف الخطط بتعتي ، بعد كده مش هقول خططي لحد " وقطع حبل أفكاري صوت إمرأة في العقد الرابع من العمر باين عليها الشقاء وظروف الحياة الصعبة بتقول لبنت صغيرة : بس يا أميرة الموديل ده غالي ومعاش أبوكي مبقاش مكفي ، التاني حلو يا بنتي وعلى قدنا.

وهنا تدخلت في الحوار قائلا : إنتي بتواجهي أي مشاكل يا حجة ؟
-         لا يبني مستورة والحمد لله ، ربنا يكرمك يا رب ؛ يلا يا أميرة هاتي الفستان الأولاني انا مفياش حيل للمناهدة .
-         إزاي يا حجة معندكيش مشكلة ؟
-         يبني خلاص اخترت الي انا عايزاه وهحاسب اهو .. يلا يا بت يا أميرة .
-         هو كل الناس مشاكلها الهدوم ، في يا حاجة حاجات كتير ومشاكل اكبر من الهدوم .
وهنا نظرت لي أميرة نظرة نارية في حين بدا على أمها علامات تفكير عميق .
-         والله عندك حق يبني _ ووضعت الفستان على الرف _ إنت شغال هنا ؟
-         اه يا حاجة انا البطل الخارق .
-         البطل الخارق .. آه .. طب يلا يا أميرة .
نظرت لي أميرة نظرة نارية وقد اغرروقت عينيها الصغيرتين بالدموع وانا بضحكلها في سعادة عشان حليتلهم المشكلة ، وع الباب قال الواد السينيه للست إنتي مش هتشتري حاجة ؟
- لا يبني شكرا هنبقى نيجي مرة تانية ، البطل الخارق الي جوه قالي إن في حاجات كتير أهم من الهدوم وبصراحة عنده حق ، سلامو عليكو

وقبل أن يتحرك الواد السينيه ليصنع حساءه من عظامي إنتقاما قررت انا على سبيل معاملة الإساءة بالإحسان التوجه له عشان احل مشاكله ، قعدت ادور عليه ولما لقيته كان ماسك في ايده مفتاح انجليزي وواقف شكله بيدور على حاجة ، فجيت من وراه وقلت بصوت مرتفع على سبيل الساب سبينس : إنت .. إنت عندك مشاكل ؟ أنا ممكن أحللك مشاكلك كلها ؟ انا البطل الخارق !

وهنا هوى المفتاح الإنجليزي على رأسي محدثا دائرة سوداء في مركز الرؤية .. تتسع بسرعة .. ولما صحيت بقى لقيت نفسي على سرير كده ودماغي مربوطة وزي ما اكون في عنبر مجانين .. وقاعد جنبي على السرير واحد كان لابس لبس ميكي ماوس .. وبيقولي إنت .. إنت عندك مشكلة ؟


دمتم ،، :D
وحيات كل عزيز وغالي اعمل كومنت متسيبونيش كده :|

Share/Bookmark

الأحد، 9 سبتمبر، 2012

نظرية إسمع كلام أمك :D

نظرية إسمع كلام أمك

_ الأحداث المذكورة في هذه المقالة كانت قبل الثورة _
أمك ، لا مش أمك كده ده واحد اسمه أمك .

----
" إسمع كلام أمك .. متسمعش كلام أبوك " .. دي تعتبر من أول الحاجات الي الطفل المصري بيتعلمها في حياته ، ده طبعا بالإضافة إلى : " اجججغغغغغ ، تف على عمو ، اش اش اش لق لق لق هو هو هو مياو مياو ، عوووو داااا " .. إسمع ومتسمعش ، أوامر مصمتة خالية من أي تفكير وتدعو الطفل البائس للتنفيذ في صمت دون أي نقاش من أي نوع .. خالص ، حتى الناس الي بتقول كده مش فاهمين هما بيقولوا كده ليه ؟ ، هل إنت فعلا عاوز تطلع جيل من الأطفال مش بيسمعوا كلام أبوهم ؟ هل ده مخطط نسائي معقد للقضاء على الرجالة ؟ مع إن نظرية المؤامرة جوايا بترجح الإحتمال الأخير لكن الحقيقة إن الناس دي بتقول كده عشان أيام الفراعنة بردو كانوا في اليوم السابع للطفل بيعملوا احتفالية صغيرة ويقولوا للطفل : " سير دي مور دي امك .. ني سير دي با مور دي ابوك " يعني اسمع كلام امك ومتسمعش كلام ابوك بردو بس بالهيروغليفي .

نفس المشكلة الي كانت عند كفار قريش زمان وكافة الكفار على مر التاريخ لما بيبقوا مش راضيين يؤمنوا بالله لأنهم اتولدوا وآبائهم بيعبدوا الأصنام .

وانا بتأمل في كتب المدرسة بتعتي فرضت فرضية هي أقرب للواقع من أي خطة او أسلوب بيتبع فيه وضع المناهج الدراسية ..

ليه ميكونش الناس الي بتحط المناهج الدراسية أصلا كائنات فضائية بينفذوا مؤامرة عن طريق ترسيخ مبادئ نظرية اسمع كلام أمك في عقول الأطفال المصريين من خلال الكتب الدراسية ؟

يعني مثلا بيقولك جو مصر معتدل جاف صيفا دافئ ممطر شتاءا ، انا عمري ما قدرت افسر الجملة دي غير دلوقتي ، لأن اكيد هو ده الجو في الكوكب الي جاية منه الكائنات الفضائية دي جاية منه وبيعلمونا كده عشان لما ياخدونا عبيد هناك نبقى متعودين على الجو ، جو مصر الحقيقي مستحيل يبقى كده.

وغير كده كتير من الحاجات الغريبة الغير منطقية والغير حقيقية والي كل علاقتنا بيها اننا نحفظها ونصمها عشان نجيب درجة حلوة في الإمتحان .

وبعد تفكير عميق وتأمل مطول إستمر حوالي خمسة وعشرين ثانية قررت أقوم بالتحقيقات والتحريات اللازمة بمساعدة الشرطة المصرية طبعا لأني عارف من كتب المدرسة انها بتساعد المصريين في أي مشكلة تواجههم وبتسعى دائما للحفاظ على أرض الوطن وابنائه ..

بالفعل توجهت في اليوم التالي إلى قسم شرطة لا داعي لذكر إسمه ، وطلبت أقابل المأمور ، فسألني العسكري الي انا طلبت منه عن سبب المقابلة فقلت ليه اني كشفت المؤامرة الكبرى ، طبعا المأمور سمحلي بالدخول بسرعة وجابلي كوب من عصير الليمون اللذيذ أزرق اللون ، انا اتحرجت اسأله هو أزرق ليه وشربت ، طبعا المأمور قالي اتكلم فانا شرحتله فرضيتي وإن فيه كائنات فضائية بتحاول تنفذ مخطط عسكري إسمه إسمع كلام أمك ، المأمور بصلي كده بصة طويلة وبعد كده لما فقت لقيت نفسي في شارع جانبي بالفانلة الداخلية _ أعزكم الله _ وشعري واقف وريحته غريبة كده .

طبعا انا مسكتش ، إزاي يبقى فيه مأمور يعمل في الناس كده وسايبينه في وسط أحسن جهاز شرطة عالمي .. فورا توجهت لوزارة الداخلية وطبعا دخلت جوه وعفاريت الدنيا بتتنطط قدام وشي وبنبرة غضب قلت لعسكري كان واقف انا عاوز اقابل وزير الداخلية ، وهنا فقط أدركت حجم الخطأ الي انا ارتكبته كمية رشاشات مصوبة ناحية وشي وناس بتفتشني وناس بتستجوبني .. وكانوا خلاص هيقيموا عليا الحد لولا إن في جرس ضرب كده ولقيت جلبة في المكان واتنين عساكر بيفتحوا باب كده دخل منه اتنين عساكر تانيين وبعدين دخل رجل سمح كده باين عليه الطيبة اوي كان بيتكلم في التليفون مع حد اسمه سعادة البيه الكبير وفجأة بصلي كده وانا كنت عرقان ومتبهدل ووشي جايب ألوان من آثار الصدمة ، وبعدين بص للعسكري الي جنبي بصة كده وكمل طريقه وهو بيقول : " مش مقدرين معاناة حضرتك يا سعادة البيه " والعسكري بيمشيني ورا الموكب .

بعد حوالي ساعتين واجراءات وتفتيشات واستجوابات لقيت نفسي قدام وزير الداخلية الي بيتكلم في التليفون من شوية وجابلي كنزاية بيبسي ، وقالي اؤمر ؟

قلتله _ في أدب مصطنع _ إن في مأمور ضربني وقلعني هدومي ورماني في الشارع الجانبي الفلاني وإني جاي له طمعان في كرم حضرته إنه يجيبلي حقي ، قام بصلي كده وفضل باصصلي يجي خمستاشر ثانية وبعدين انفجر ضاحكا وهو بيضرب كف في كف وبيقولي وهو لسا مش قادر يبطل ضحك : وإنت كنت بتعمل ايه عند المأمور قبل ما يعمل فيك كده ؟
- كنت بقدم بلاغ يا سعادة البيه .
- بلاغ أيه بقى ؟
- اصل انا اكتشفت المؤامرة الكبرى .
- هههههههههههههههههه وإيه هي المؤامرة دي ؟
- انا تحمست بعد ما لقيت ترحيب واضح من سيادة الوزير وقلتله بنفس الحماسة : في كائنات فضائية بتحاول تنفذ مخطط عسكري إسمه اسمع كلام أمك !

بعد كده صحيت في نفس الشارع الجانبي وانا لابس نفس الفانلة ، الدم غلى في عروقي وقررت أروح لرئيس الجمهورية ، وبعد حوالي شهر ونص من المحاولات والورق والطلبات والروتين الحكومي إياه وافقوا على طلبي لمقابلة الرئيس ، وطبعا دخلت للرئيس وشرحتله مشكلتي وإني في مخطط بيتم ورا ضهره عشان الفضائيين يدخلوا مصر وينفذوا مؤامرة إسمع كلام أمك .

بعد كده صحيت في نفس الشارع الجانبي وانا لابس نفس الفانلة بس كان في ورقة في إيدي مكتوب عليها بخط أنيق : " مش ماما قالتلك متدايقش البوليس يا حبيبي ؟ إسمع كلام أمك يا حبيبي ، عشان متحصلكش مشاكل "
إسمع كلام أمك يا حبيبي
إسمع كلام أمك

وهنا فهمت ان المؤامرة كبيرة وإن الفضائيين الي بيحاولوا يخلونا عبيد مش هما بس الي بيحطوا المناهج ، وإن إحنا فعلا في خطر !

هو الجو بقى معتدل جاف فجأة ولا انا بتهيألي ؟


لو عجبتك اعمل كومننت .. والنبي والنبي والنبي :D
دمتم ،،

Share/Bookmark

الثلاثاء، 21 أغسطس، 2012

وانا ف الطيارة

آخر مرة اركب فيها طيارة قبل دي كانت من حوالي 8 سنين .. كان الموضوع مختلف تماما عن كده .. اكيد مش هتكلم عن اختلاف القوة الطاردة المركزية الي بتطلع عين اهلنا اثناء الاقلاع والهبوط .. ولا عن الصداع الي بييجي بسبب تغير الضغط مع انها مش بيتغير لأن الطيارة مقفولة .. عشان دي ثوابت فيزيائية مش بتتغير _للأسف_

انا هتكلم عن افعال المصريين جوه الطيارة .. ف الاول في صالة الإنتظار كان كل الناس بترغي مع بعض ف حاجات ملهاش لزمة .. وعيال بتجري وتاكل سندوتشات بيض .. وناس نايمة وناس واقفين جنبيهم يتكلموا ف التليفون بصوت عالي على اساس انها مكالمة دولية يعني .. وكمية العيال الي بتعيط وتتنطط وتقول عاوز اركب الطيارة ايه بقى .. مقولكش !

وعلى سلم الطيارة كنا كأننا واقفين على سلم مدرسة ..بيزقوا بعض عشان يخشوا والي بيشتغل التاني وياخد دوره .. وجوه الطيارة كانت مدرسة حقيقية .. جم الأستاذة .. اقصد المضيفين .. عشان يورونا ازاي نستخدم سترات النجاح .. سترات النجاة معلش .. على ما خلصوا كنت حسيت ان الطيارة وقعت فعلا !! :| 

كل واحد بقى ربط الحزام كأنه بيشنق واحد كافر .. ومسكوا ف الكراسي وغمضوا عنيهم واتشاهدوا .. ويقولك المصريين شجعان .. دول كانوا عاملين زي الفراخ وربنا !

وبعد الإقلاع تكرر مشهد صالة الإنتظار تاني .. عيال صغيرة بتجري وبتلعب استغماية ف الطيارة .. الي عمال يستظرف على طقم الطيارة .. والي طلع كيس عيش فينو عشان العيش الي ف الطيارة مكنش كفاية :| :|

وطقم الطيارة بصراحة كان مستحمل الناس دي وقايم بدوره على اعلى مستوى .. يعني مثلا كان في راجل صيني كده ف الطقم ده كب مية على بنطلوني .. وطلبت منه مناديل حوالي 9 مرات بكل لغات العالم الي اعرفها .. وهو تقريبا مكنش عارف غير كلمة واحدة i'll be back :| :| 

ولا الأكل والشاي الي شربناه .. انا اعتقد ان شاي العروسة احسن منه مع اني مدوقتش شاي العروسة قبل كده :D

المهم .. الطيارة هتهبط دلوقتي وانا طبعا مش هعرف اكتب وانا مغمض عيني فضلا عن ان ايدي هتبقى ماسكة ف الكرسي والموبايل ف جيبي مش هعرف استعمله ... اشهد ان لا اله الا الله وان محمدا رسول الله :D :D :D

Share/Bookmark

الجمعة، 10 أغسطس، 2012

عوثمانيات تاني ! ( فورث اديشن - تنمية وبشرية ! )

 العوثمانيااات :D


أكمل قراءة التدوينة !
---------------------------------------------


Share/Bookmark

الأربعاء، 8 أغسطس، 2012

العثمانيات ! ( الجزء السادس - الفلسفة العثمانية )

بما إني لسا صاحي من النوم ومش مركز فأنا هنقل التويتات الي بتتحدث عن الفسلفة العثمانية ف الحياة زي ما هي :D


أكمل قراءة التدوينة :D

Share/Bookmark

الأربعاء، 27 يونيو، 2012

عوثمانيات " مش فاكر رقم كام " .. تنمية وبشرية تاني :D


حبة عثمانيات تنمية بشرية كمان .. عن ازاي تحقق حلمك من غير ما يجيلك احباط من اي حاجة وازاي توصل لعقلك الباطن :D

كل واحد فينا بيبقى عنده احلام وطموحات وكدده بس قليلين اوي الي بيحققو الي هما عايزينو وكتير بيحطبو ومبيعملوش حاجة ‎:(‏ 1
على الرغم من ان الناجحين والفاشلين بيبقو في نفس المستوى بالزبط ويمكن كمان فسه ناس فشلت مع انها اكثر احترافية في مجالها الي نجح فيه التانيين2
الناس الي بتفشل مع انها كانت كويسة وكده بتقول ان السبب الظروف او المجتمع ومبيقولش كده كتبرير لا فعلا بيبقو مصدقين نفسهم 3
لكن السبب الوحيد لنجاح او فشل اي انسان هو العقل الباطن والأوامر الي بياخدها ، ولا المجتمع ولا الظروف ولا اي اعاقات بتفرق في نجاحك 4
لو انت فهمت عقلك كويس حتى لو كل المجتمع مش متقبلك وبيحبط فيك هتنجح ولو انت مش فاهم هتفشل حتى لو كل المتجمع بيساعدك 5
مش هتكلم عن الفاشلين عشان مش ناقصة احباط بس هقولكو ازاي نتحكم في عقلنا الباطن ونخليه يعمل اي حاجة 6
الاول انت عارف قوت كإنسان قد ايه ؟ انت تقدر تعمل اي حاجة دي حقيقة مسلم بيها وغير قابلة للنقاش 7
طالما في انسان زيك قدر يعمل حاجة يبقى انت تقدر تعمل احسن منها لأن كلكو بشر وربنا اداكو نفس الامكانيات بالزبط 8
حتى لو عندك اعاقة معينة جسدية مثلا فانت تقدر تعمل زي الانسان العادي بالزبط لأن العقل واحد وقوة الإنسان ف عقله مش فجسمه 9
السؤال بقى : إزاي استعمل قوتي دي واوصل بيها للي انا عايزه بدل ما افشل واحبط ؟ 10
اول حاجة اكتب هدفك والي انت عاوز تعمله ف ورق دايما اكتب واستخدم اكتر من حاسة عشان توصل المعلومة لعقلك الباطن 11
يعني كل يوم الصبح هات ورقة صغيرة اكتب عليها الحاجات الي هتعملها النهاردة وعلقها على التلاجة مثلا او على مكتبك 12
يبقى انت كده عقلك الباطن طول النهار بيشوف الي انت عاوزه حتى من غير ما انت تاخد بالك ، واي معلومة بتخش العقل الباطن بتبقى أمر 13
لو انت قدرت توصل الأمر ده لعقلك الباطن مش هيسكت غير لما ينفذه .. زي الإنسان الآلي الي بيجي ف الكارتون .. 14
كل أمر انت بتوصله لعقلك الباطن بيبقى بمثابة مهمة .. عقلك الباطن بيسميها " لا تراجع ولا استسلام " 15
واحد مثلا بيشرب سجاير .. هيقول لعقله الباطن متشربش سجاير تاني وهوصل المعلومة ... وبردو هيفضل يشرب سجاير ‎:(‏ عارفين ليه ؟ 16
عقلك الباطن مش زي عقلك الواعي .. ميعرفش يعني ايه لا وميعرفش المشاعر وميعرفش اي حاجة .. كلمة متشربش زي اشرب بالظبط17
يبقى انت المفروض توصل المعلومة لعقلط الباطن بسيطة ومش متزوقة ومش معقدة عشان يفهمها وينفذها بسرعة 18
احمد زويل مثلا وهو صغير كان كاتب على باب اوضته دكتور احمد زويل ، وفلعا بقى دكتور احمد زويل عشان فضل يدي كل يوم أمر لعقله الباطن بكده 19
بتنسى ؟ عمرك جربت لما تعوز متنساش حاجة تقول لنفسك افتكر ده افتكر ده افتكر ده ؟ جربها دلوقتي وكل شوية هتفتكر الحاجة دي مش هتنساها 20
وابعد تماما عن الروتين والحاجات المملة او العادية ركز ف الحاجات الغريبة او المستفزة حتى اوامرك لنفسك خليها غريبة مش عادية عشان عقلك يستجيب21
عارف ليه انت مبتفتكرش النكت الحلوة وكل النكت الي بتفتكرها بتبقى سخيفة ومش عاجباك اصلا ؟ عشان عاجبة عقلك الباطن لأنها غريبة 22
ومتقولش ابدا انا مش زي ده او انا مش احسن من ده .. انت احسن من كل الناس وتقدر تعمل اي حاجة الناس عملوها لو انت مقتنع انك تقدر 23
ربنا ضربلنا مثل عظيم على الموضوع ده ، الآية الي بتقول " إنه لا ييئس من روح الله إلا القوم الكافرون " 24
لو انت بتدعي ربنا وبتقول في نفسك ربنا مش هيستجيب يبقى انت كده عقيدتك ناقصة ودعائك بالطريقة دي ف حد ذاته معصية 25
لازم تبقى واثق في ربنا ومسلم ليه حياتك وربنا بيستجيب دعائك حتى لو انت مخطئ او عاصي وربنا بيقل توبة اي حد " خير الخطاوون التوابون " 26
نفس الكلام مع نقسك لو انت واثق في نفسك وف قدراتك هتعمل الي انت عاوزه لأن ربنا ساوى البشر كلهم ببعض فإنت بكده تقدر تعمل اي حاجة 27
ومتخافش ابدا من الغلط لأن الغلط من صفات الإنسان اصلا لأن مفيش حد معصوم او كامل الكمال ده حاجة عند ربنا لوحده .. الكمال لله 28
انما متستلمش لغلطك واستفيد منه بأكبر صورة ممكنة ومتغلطوش تاني .. لا يلدغ المؤمن من جحر مرتين 29
ومع كل ثقتك دي إنكر ذاتك ودايما حاول تبقى احسن متوقفش ابدا ومترضاش بالي انت فيه ربنا خلق الظروف عشان نتحداها مش عشان نستسلم ليها 30
ومتتكلمش كتير اسمع وفكر وإتأمل إتأمل ف حياة الناس وكلامهم وف التاريخ وقصصه وف القرىن وفي السنة ، هتوصل لحاجات كتير من التأمل 31
وحاول تعرف عن كل حاجة حاجة قبل ما تتخصص في حاجة واحدة عشان تختار صح .. خد خبرة ف جميع المجالات وثقف نفسك وبعدين اتخصص واحترف مجال واحد 32
ومتخليش ابدا الناس تحبطك او تبطل الي انت بتعمله عشان نت فيه لوحدك .. ابراهيم الفقي بيقول : اذا كنت مع الله فانت مع الأغلبية العظمى 33
وسيدنا على بيقول : لا تستوحشو طريق الحق لقلة السالكين فيه 34
وخد اكبر مثال على كده سيدنا محمد لما جهر بالإسلام كان معاه كام مسلم ؟ 35
فخليك واثق في ربنا وقدراتك الي ربنا ادهالك وسيطر على عقلك الباطن لأنه بتاعك واستفيد من جسمك وعقلك اقصى استفادة عشان تحقق حلمك 36
ولما تحلم حلم كبير مش عيب ومش غلط والي هيحبط هو الي غبي مش انت الصح انك تحلم حلم كبير مش تحلم على قدك 37
ومتحاولش نتنقم من حد احبطك او تضيع وقتك معاه ، خلي انتقامك الوحيد هو النجاح وخلي كرم اخلاقك يحبب اعدائك فيك 38
مش عيب انك تحلم .. العيب ناك متحققش حلمك .. حرام متحققش حلمك لأانك كده بتمنع خير وعلم كان في ايدك تقدمه ومقدمتوش 39
هذا والله الموفق والمستعان 40


فولو بقى على تويتر الي كتبت عليه الحاجات دي :D
https://twitter.com/#!/ahmed_3osman

وقولي رأيك ف الكلام ده ف كومنت من تحت :D
ملحوظة : لو مكتبتش كومنت قولتلي رأيك عقلك الباطن هيطلق مراته بالليل :)
دمتم ،،

Share/Bookmark

الثلاثاء، 5 يونيو، 2012

مسرحية الثورة !! ( الثورة سابقا )

فين منين يودي فين
مش هكون بين البينين
عندي حلم وحلمي عارفه
ومش هييجي من يومين

ناس تقول وناس تعيد
كنا عايشين كالعبيد
كنا نشرب مية فاسدة
ناكل الحجر الشديد

قولت يوم يسقط نظام
ضحكوا قالوا : يا سلام
صفحة ع الفيسبوك خلت
كل دولا بتوع كلام

رحت ووقفت في ميدان
كان بربي في إيمان
والإيمان لو كان سلاحنا
كنا فزنا ومن زمان

والعساكر وقفوا كوم
والي ماتو بردو كوم
بالرصاص الحي خدنا
وللأبد رحنا ف نوم

سيبو علينا الجمال
وبأوامر من جمال
طلق قناصة سعادته
كان علينا بالوبال

وبعد إسبوع إنتصرنا
وبمحاكمة قد أمرنا
بس مسكتنا العساكر
فوق كده إحنا صبرنا

شهر عدى وشهر فات
كام شهيد في الشهر مات ؟!
والرسايل نازلة تعكس
كل باقي الرسالات

كلّ الثوري ومل وقال
إسمع يا إبن الناس .. العال
سبيك منها وامشي بسرعة
مش طالبين غير الترحال

والثوري دهوَّن تاني يوم
اتلخلخ من وسط القوم
وامه بتمشي تنادي عليه
في الشارع اه يا عيب الشوم

طلع الشعب وقام بمظاهرة
نحن نريد حكومة طاهرة
ورئيسا ويعين نائب
شغله إنه يسليه في السهرة

أحسن ما بيتسلى علينا
بيسرقنا .. بنشوف بعنينا
الظلم بيتكلم عبري
بيتشعلق بحبال في إيدينا

تاني يوم مش لاقيين الناس
قفلوا عليهم بالترباس
في الزنزانة أترص الشعب
شاكب راكب بالحباس !

ورسالة ومكتوبٌ فيها
من عم الثورة وحاميها
للشعب الأمور النايتي
إخشع ياض ده انا واقف فيها

قام الشعب اتعفرت طار
وميداننا رجعلوا الثوار
وإعتصموا 18 يوم
علشان ياخدوا لمصر التار ..

عملو علينا مؤامرة بجد ..
كدب كتير مبقاش ليه حد ..
ومحاكمة واخرها براءة ..
وابقو زورونا يوم الحد ..

والطاغوت مثبتش عليه ..
محطوطة ف المية ايديه ..
واحنا ايدينا .. قطع ايدينا ..
احنا ظلمنا سعادة البيه ..
XD
الثوار ماتو لوحديهم ..
والخرطوش كان مالي ايديهم ..
ومبارك كان ف الميدان ..
بيحاول انه يهديهم ..

حسني كان ويانا بيهتف ..
وابنه علاء كان صافي النية ..
وجمال كان حلمه من الدنيا ..
انه يجيب شقة وعربية !

وسوزان كانت ستة مكافحة ..
كات شغالة ف مصنع غزل ..
والي يقول حرمية بتسرق
يبقى اكيد بيحب الهزل

وشفيق الضربة الجوية
من غيره مكنتش تقوم
هو و حسني مبارك عملو
على اعدائنا احلى هجوم

وجدودنا الي اتقتلو يوميها
ولا ليهم كان اي لزوم
وكأن مبارك ده لوحده
خاض الحرب وهزم الروم

وحبيب العادلي ابن العادلي
كان راجل عادل وامين
الداخلية ف عهده كانت
فندق فاخر للمساجين

واما الثورة عليهم قامت
كان واقف يحمي الميدان
ولا عمره ضرب نار على مصري
ولا عمره موت انسان

ولا عمره اتعذبنا ف سجنه
ولا عمر نفر منا اتهان
ده حبيب العادلي ابن العادلي
كان حد لطيف كان انسان

وسيادة الطنطاوي الطاوي جناح الرحمة تحت ايديه
ولا عمره قتل حد اتظاهر ولا عمره كان لابس بيه

ولا عمره اتمادى او ماطل
ولا طلع احكام بالباطل
ولا موت بني ادم عاطل
وسلاحه كان بس ايديه

وسيادة القاضي احمد رفعت
كلمة حق هقولها عليه
القاضي بيحكم بورقته
وملوش دعوة كان شاف ايه

والقاتل لو شفته بيقتل
ومفيش اي دليل بيدين
يبقى هياخد حكم براءة
واحلى تحية للقوانين

الثوار طبعا من الحكم اتجنو ونزلوا ع الميدان
مستني ايه يا عم الثائر من مجلس باع دم وخان
مستني ايه من الطنطاوي و م الشاذلي او من عتمان
مستني ايه من ابو صابع او من ابونا سامي عنان

الناس كات بتقول خربوها
دول ناس تعبانة وتعبوها
والعجلة أهي واقفة وبدَّالها
الي مطلع عين الي جابوها

مربوط بصامولة ومسمار
زنجة زنجة دار دار
والعرس بتاع الحرية
مش هيشارك فيه الثوار

جابم مرسي وجابو شفيق
الواحد قرب يتجنن
والاعلام عمال يتفنن
والخلق بدأ انه يديق

خالتك سلمية اتوفت
قلبها فرقع م الأحكام
والشعب ف ميدانه اتوحد
زي الثورة الأولى تمام

وباذن الله انا متفائل
المولى بيجيب السائل
والدعوة اما تكون على ظالم
ربنا مش ناسي المظلوم

ومتنسوش وان كنتم قلة
ان القلة طريقها الحق
حاربو وثورو على الي بيظلم
ربنا مش بيضيع حق

مسرحية مسرحية
والعصابة هي هي ..
 والجمهور بيقولها لأ ..
الثوار هما الي معاهم حق ومليون حق وحق !
حق ومليون حق وحق !

للي مشافش الفيديو : http://www.youtube.com/watch?v=tLeUkDmZRr8
ملحوظة : نص القصيدة متألف في رمضان 2011 والنص التاني متألف امبارح والنصين متلخبطين ف بعض :D

Share/Bookmark

الأربعاء، 16 مايو، 2012

كلمات مش عيب ( كلام بنقولو ومش عارفين معناه ! ) الجزء الخامس

من اكبر المشاكل الي بيعاني منها الشعب المصري لسانه ، معلش بقى ومن غير زعل احنا شعب بيحب الكلام وبنتكلم اكتر ما بنعمل .. مش دي المشكلة الموضوع ممكن يتاخد بطريقة ايجابية الثورة نفسها جاية من الكلام ! لكن المشكلة لما نقول كلام احنا مش فاهمين معناه .. هتقولي إزاي يعني ؟! طب خد عندك دول .. انت لما بتحصل مشكلة بتقول يا خراشي او يا لهوي .. عارف يعني ايه يا خراشي ؟! طب لما واحد يقول لواحد يا ابن " الإيه " .. الإيه ده عبارة عن إيه ؟! طب يعني ايه خرونج ؟! طب لما بتقول كوسة على حاجة .. اشمعنى الكوسة ؟! اكيد مش حل المشكلة اننا نمنع الناس تتكلم .. اكيد لو حاولنا نعمل كده هيعملوا ضدنا ثورة ! .. لكن ان الناس تفهم معنى الكلام ده اكيد هيبقى احسن .

كتبت قبل كده اربع تدوينات في الموضوع ده هتلاقوهم ف الصفحة دي :)

دورت على معاني كلام كتير وإزاي الكلام ده بقى في لغتنا .. وجبت كلمات من اللغة المصرية القديمة ولغات تانية ولسا لغاية دلوقتي موجودة على لسان الشعب المصري ! وجمعتهم ف سلسلة تدوينات كلمات مش عيب .. ودي التدوينة الخامسة :)
المرة دي هعرفكم معنى " فضيحته بجلاجل ، التالتة تابتة ، خرونج ، كاني وماني ، الحابل والنابل ، منا خوليا "
بالإضافة لكلمات مباشرة زي : " بس ، دستة ، طشت ، قرطاس ، كخ ، حدوتة .. إلخ "



أكمل قراءة التدوينة :) 

Share/Bookmark

الاثنين، 16 أبريل، 2012

عيد البيض عند قدماء المصريين !

عيد البيض ..

عيد شم النسيم عند المصريين القدام بيعلن بداية الحياه لإن المصريين القدام شافو ان الربيع بداية الحياه (لان الزهور بتتفتح فى الربيع و كمان الزرع بيخرج من الارض). 
والمصريين بقالهم خمستلاااف سنة بيحتفلوا بالعيد ده .. ولأن البيض عادة مصرية قديمة .. عفوا .. تلوين البيض عادة مصرية قديمة .. ارتبط عيد شم النسيم بتلوين البيض ! 
المصريين القدماء كانوا بيحتفلوا بعيد شم النسيم عن طريق اكل البيض الملون والفسيخ او السمك المملح عموما وده تعبيرا عن حب النيل بالإضافة لعادات ظهرت مؤخرا بتعبر برده عن حب النيل زي التبرع بالقمامة وتنقية مياهه باستخدام مخلفات المصانع ، وكان المصري القديم في اليوم ده بياكل بصل وبيشرب عصير بصل كنوع من التحلية لأن البصل كان رمز للحياة عند المصريين وبيعلقوه على حيطان بيوتهم وده الي بيحصل لغاية دلوقتي !

زمان كان الإحتفال بشم النسيم عبارة عن مهرجان شعبي بيبتدي مع طلوع شمس اليوم وكان بيقضيه المصريين في الفسح في الجناين وعلى شط النيل والأماكن الي فيها زرع ودايما بيكون يوم الاتنين الي بعد عيد الفصح .. دلوقتي الاحتفال بشم النسيم بيبقى برده عن طريق الخروج والذهاب لأحد المصائب المسمَاة " كولور فيستيفال " وهو كما نعلم جميعا عبارة عن مكان فيه ناس مجانين عمالين يحدفوا على بعض الوان مية كنوع من الفراغ العاطفي .. او فعل افعال فاضحة لا داعي لذكرها ف الطريق العام !

شم النسيم، أقدم عيد شعبى فى الدنيا، بيفتخر بيه المصريين بإعتباره عيد خاص بيهم و بمصر بغض النظر عن عقائدهم الدينيه. اتنقلت مظاهر كتيره من احتفال المصريين بعيد شم النسيم لمناطق تانيه فى العالم و حتى أوروبا وده يدل على ان عمرو موسي فعلا يقدر يخلي مصر زي اوروبا في مية يوم ، شاملة ضريبة الخدمة والمبيعات وبوسترات ابو اسماعيل ..

احتفلوا بشم النسيم مقلناش حاجة .. بس بلاش كولور فيستيفال ومتكتروش ف البيض  :D
وكل سنة وإنتم طيبين !
دي اول تدوينة اكتبها من غير ما اقول دمتم،، وبالمناسبة السعيدة دي ..
اعملولي فولو على تويتر :D
https://twitter.com/#!/ahmed_3osman

Share/Bookmark

الثلاثاء، 27 مارس، 2012

إنتحارات عثمانية :D ( عثمانيات ثيرد اديشن )

 في ليلة مطيرة وتحديدا يوم 9\9\1996 .. كان ابو خالد ومراته وخالد واخته قاعدين يتعشوا جبنة وزتون وخيار وبيض مقلي وعسل ابيض .. عادي زي كل يوم .. بس الي ابو خالد ميعرفهوش ان في اليوم ده اتولد اكبر كارثة في تاريخ البشرية .. ابو الكوارث .. احمد العثمان !!

لو عاوز تعرف قصص انتحاري ، ولو عاوز تعرف مين ابو خالد .. اكمل قراءة التدوينة :D

Share/Bookmark

الثلاثاء، 13 مارس، 2012

علمونا في مدرستنا .. نكون حمير !!

تدوينة عن التعليم .. وانا بتشقلب في الفيسبوك لقيت كليب اسمه علمونا في مدرستنا ، على صفحة الفنان المثقف المحترم عمرو مصطفى ( #$%#% ! ) .. ونزلت دمعتي !
أبدأ منين بس ؟! كليب مستفز جدا .. مستفز بدرجة مشير !
والي استفزني اكتر ان الناس انضحك عليها فعلا وعجبها الكليب وبدأت تشيره .. زي ما بنحب اغنية حافظ على ولاده بالظبط !
بغض النظر عن الكليب ده بشكل او بآخر بيحاول يصلح من صورة المجلس العسكري الي هي اصلا زي الزفت ..
مفيش ولا كلمة صح ..
التدوينة عن مدرستي وعن الي اتعلمته منها .. وصدقني لو مشفتهاش تبقى متعرفش حاجة عن التعليم في مصر !

تنويه :المدرسة الي اتصور فيها الكليب هي مدرسة نفرتاري الألمانية الدولية ومصروفاتها 27 الف جنيه سنوية .. وده _ كما نعلم جميعا _ مبلغ متوفر في جيب اي مواطن مصري!


لا قدر الله لو التدوينة وصلت لإدارة المدرسة ابقوا افتكروني بالخير واعملولي فولو على تويتر :D


صدق او لا تصدق .. حوش مدرستي !

Share/Bookmark

الجمعة، 9 مارس، 2012

هعمل ايه لو معايا 72 مليار جنيه ؟!


72 مليار
 
تدوينة بتتكلم عن اول حاجات هعملها لو كان معيا 72 مليار جنيه ..
ملحوظة : الرقم ملهوش اي علاقة لا من قريب ولا من بعيد بثروة المخلوع حسني مبارك .

- اول واهم حاجة هشتري الفيسبوك والغي المزرعة السعيدة .
- هشحن موبايلي بمليون جنيه واجيب بيهم كلهم باقات نت عشان ارتاح من الرسايل السخيفة الي مبقرهاش بتاعة النت .
- بالحديث عن التجديد هجدد دومين هستيريا مية سنة وانقلها على موقع محترم يعمل ( يا كبد امه ) بالوورد بريس .
- هشتري مليون واحد يعبروني ويعملولي لايكات وكومنتات .. وبالحديث عن اللايكات والكومنتات .. ابوس رجلك اعمل كومنت :D
- هجيب نت برودباند بدل النت المعوق ال512 الي عندي ده . ( مش متأكد م الاسم ) .
- هشتري شنطة لاب للضهر وارتاح من وجع الكتف الأزلي الي عندي .
- ضهري هيبدأ يوجعني من الشنطة الجديدة فهرميها واجيب عبد افريقي يشيلي اللاب .
- هجيب خادمة فلبينية تقصلي ضوافري وتحلقلي شعري وتقولي اني بقالي اسبوع مكلتش والحاجات الي انا بنساها دي .
- هشتري تابلت وبعدين اكتشف اني مبعرفش ارسم فاديه لاختي .
- هشتري خمس شاشات واعلقهم جنب بعض واشغلهم كلهم بماوس وكيبورد واحد وبعدين اطفيهم واعد ع اللابتوب.
- هجيب هارد 2 تيرابايت ورامات 32 جيجا وكارت شاشة 4 جيجا وبعدين البوردة متستحملش فتفرقع .
- هشتري معصرة قصب في البيت عشان اشرب قصب من غير ما اروح مشوار لاخر الدنيا .
- هجيب ماوس لأنكوا لو شفتوا الماوس بتاعي هتنتحرو والي مش هينتحر هيجيلوا سكتة قلبية وهينتحر برده .
- هجيب مكتب كبييييير .. اكبر من الي انتوا تخيلتوه واكبر من الي انتوا تخيلتوه بعد ما قلتلكوا انو اكبر من الي انت تخيلتوه . ( كبير اوي اوي يعني ) .
- هشتري ميدان التحرير واحطه على مكتبي الكبير واعد اتفرج براحتي .
- هنقل شارع محمد محمود جنب ميدان العباسية .
- هخلي كاتشب وولعتين يفتحوا افرع عندي في الاوضة .
- هشتري تويتر واحط فيه خاصية الوخز .
- هشتري جاكت لطيف " شفتوا في الحلم مرة " والبسوا قبل ما انام .
- هتجوز .
- هشتري معازيم للفرح كلهم يلبسوا جواكت وكوتشيات و انا بردو البس جاكت وكوتشي ومحدش يلبس بدل خالص .
- هضطر اروح اشتري بدلة لان العروسة مش هتوافق والمعازيم كلهم هيبقوا لابسين كوتشيات وشكلهم وحش اوي .
- هاخد مراتي بالليل ومنروحش بيتنا نطلع ع باريس ونقضي هناك شهر عسل 750 سنة .
- لما اجي من شهر العسل هفتح شركة ادوات صحية ومستلزمات كمبيوتر ولاصقات سحرية واسميها " الشركة الصحية السحرية  العجيبة لادوات الكمبيوتر " .
- هشتغل في الشركة شوية كـ ( تضييع وقت ) .
- هعمل اعمال خيرية كدعاية للشركة ..
- هعمل تحاليل لأدمن تيم كائنات اثبت ان الإنسان اصله كان بيضة .
- هفتتح قناه خاصه لممدوح فرج و اعمله قمر لوحده و مش هخلى حد يشوفه .
- هشترى حمام متنقل معايا.. يوم ما اتزنق انط جواه .
- هشترك فى جيمّ من ابو 5000 جنيه فى الشهر و احاول اطلع عضلات بطن .
- هفشل و مش هعرف اطلع ولا عضله.. فهروح اعمل عمليه يحطولى حديد فى كرشى .
- هدى فلوس لكل المدونين الي في هستيريا ما عدا عبد الله علاء .
- واخيرا وليس اخرا .. هموت مفلس .

ويا حسنة قليلة .. تمنع بلاوي كتيرة :D

دمتم ،،
اعمل فولو لعينة :D



وإعمل لايك وشير وكومنت :D ارجووك :(



Share/Bookmark

الثلاثاء، 6 مارس، 2012

أوول إنجليتش أوول ظا تايم ! وحيات الحاجة ريد ات !


اي نو ذات اتز ايمبوسيبل فور يو تو رييد زس تدوينة لعينة .. بيكوز اتز مكتوبة ان انجليش ويز ارابيك ليترز .. بت يو مست ريد ات ان اول كيسز .. بليز ريد ات .. وحيات الحاجة ريد ات .. آيام شور ذات يو ول لايك ات جست تراست مي .. يو نو ؟! مي آز أعوثمان .. إنبسطت D:



ان ماي اوبنيون .. مازر فاكن فرانكو ارابيك اذ ون اوف ذا موست ستيبود ثينجز ايفر .. ون يو اور ايني ون رايتينج وز ات .. اي فييل زا سيم فيلنج ذات يو ار فيلنج فروم ذات انبيليفوبل طريقة كتابة ان زس تدوينة .. اي مين .. واي يو دو زس ان ايمبورتانت ثينج .. يو كان _ايزلي_ رايت افري لانجوتش ان اتز ليترز .. انجلش ان انجلش ليترز .. ارابيك ان ارابيك ليترز .. اوف كورس اي دونت ريسبكت ذات نائب حزب النور ثينجي هو سيد ذات ليرنينج انجلش از آ مخطط .. يو كان الويز ريميبر ذات كوت : " من تعلم لغة قوم أمن مكرهم " .. هاو اتز آ مخطط إذا ؟! واي يو سيد ذات جنتل مان ؟! وااااااااي ؟! وات از زا مبرر ؟! ( شوبير ستايل ) ..  باي ذا واي .. ليرنينج ان ايجيبت وُوس ان انجليش لانجوتش ( تامر من غمرة استايل )  آنتيل سعد زغلول _ ربنا يرحمه _ كيم اند ميك ات ان ارابيك .. إيني واي زس از نوت آور سبجيكت .. المهم .. إتز كفاية بيكوز اي ستارتد تو اهيس اند يوم مست بي سافرنج فروم زيس هيروبيل طريقة كتابة .. جست بيليف مي .. اي فيل زا سيم فيلنجس وين يو رايت ان فرانكو .. ستوب ات .. اند استرجل شوية .. فرانكوا از فور العيال السيس المنسونين اونلي .. اوف كورس اي دونت مين يو .. يو ار راجل اوي بت دونت رايت ان فرانكو .. وحيات امك متكتبش فرانكوا ده انا مرارتي اتفقعت :D سيف يور لانجوتش اند اعتز بيها .. اند دو لايك مي .. ماي نيم ان فيسبوك از ان ارابيك .. اي ميد ات ان ارابيك اند مخستش ولا حاجة .. اي نعم خسيت شوية بس مش تو ماتش يعني :D

اف يو ستيل ونت تو رايت ستيوبد فرانكو ثينجي اني مور .. اي هاف ماي لاست جان ( سلاحي الأخير ايها التنين المجنح ) .. وين يو رايت ان فرانكو .. اي ويل رايت ان عربش .. اند زس از عربش :D
( احمد عثمان اونلي ويل ريليت )


ات زا ايند اوف زس سمول تدوينة وتش بتجيب صداع .. اي ونت يو تو بي شور ذات يو كليكد ذا لايك بوتتون ان زس بيدج .. 
اند ايم شور يو وول لايك ات .. جود باي وبوسة
دمتم ،،


متنساش تعملي فولو لعينة على التويتر :D



وإعمل لايك وشير وكومنت ووريها لاصحابك واجبر بخاطري مرة في حياتك كده :D وربنا حرام الي بتعملوه فيا ده يا جدعان .. شيير :( شيير بقى :( شيير متخليكش غلس :( شير ياعم .. :D

Share/Bookmark

الجمعة، 17 فبراير، 2012

العوثمانيات - سكند اديشن


هذه العثمانيات المزعومة سخيفة جدا ولا تهدف لأي شيء على الاطلاق ، مجرد حاجات ملهاش لزمة اكتنبها لانني اريد ذلك .. لا انصحك باضاعة ثانية من وقتك في قراءتها .. أما اذا كنت بدأت فعلا فواجب عليك اللايك والشير والكومنت والا ستحل عليك لعنة عثمان التي لا يشفى منها المرء بسرعة بعد بضع مئات من السنين كما لعنة الفراعنة وغيرها . :D


صباح الدانوب الازرق والموسيقي الكلاسيكية الرائعة !! =) جمعة مباركة ،،
:)

العثمانيات !
انا قلبي مش مساكن شعبية ، قلبي يتسع لبني ادم واحد بس ‎:D‏ .

فلة .. شمعة .. مدورة !

دايما بلاحظ ان كل مؤيدي الثورة ومتعصبينها مختلفين ومميزين وغالبا عباقرة ، مشفتش واحد مضاد للثورة وفي حاجة بتميزه يعني :@

الأعراض : حالة وهميسة غير مستقر متنقلة بين موسيقي عمر خيرت واغاني ام كلثوم وبكتب وارسم حاجات غريبة ، التشخيص : بتحب يا معلم ‎:D‏

بيقولو ان الي في سني ايام العرب كانو بيقودوا الجيوش .. طب ما هم كانوا بيتجوزا في نفس السن ده بردو .. لو جوزتوني انا مستعد امسك بلد بحالها ‎:D‏

اكتر حاجة استغربتها في معرض الكتاب الي واقف على كتب وبيقول : الواحد باتنين ونص اربعة بعشرة ، إلكي نظرة يا استاذ الكي نظرة يا انسة !!

من فوائد علم الأحياء : دراسة الكائنات الحية كالكلاب مثلا ودراسة ميتينهم ايضا ، ومعرفة امتى يبقى الانسان ابن كلب او حمار والفرق بينهما ‎:D‏

يذكرني كوب الشاي الساخن بكِ ‎:D‏ مش عارف ليه ‎:(‏ ( قال يعني في حاجة مش بتذكرني )

انا قررت لما اكبر اعمل حمامي من غير بانيو ، طب هستحمي فين ؟! مش هستحمي .. مش احسن ما اموت متكهرب !! #تهييس #هبل

كل فيلم لازم يبقى فيه ابن مجنونة بيعمل تصرفات غريبة ، واحنا نعد طول الفيلم نتفرج على عواقب تصرفاته ‎:D‏

انا عاوز اعرف ، الراجل الي كان واقف ورا عمر سليمان كان واقف وراه بيعمل ايه ‎:(‏ مش عيب كده !

محدش بينجرح اوي ، خالص .. ‎:D‏

الاخوان مسكو البلد ، تعبير سخيف اوي ‎:D‏ المصريين هما الي مسكوا البلد لانهم اختارو الإخوان ، اعضاء البرلمان بيمثلوا الشعب مش بيمسكوه !!

دول دول دول خبلانة ، الي فاهمهم راسه تعبانة ، تفهم ايه يحموك في كنكة ، كان غيرك اشطر ;D ‎#EgyParliament‏

الغباء البشري لا يتوقف عند حد معين وانما يستمر في التزايد والتزايد لحد الإنفجار ^^


كفاية كده عشان البروزر هنج ونسيت انا كنت واقف فين :( لايك وشير وكومنت عشان معملش جزء تالت ، الجزء التاني اتعمل عشان معملتوش كومنتات على الجزء الي فات :D

دمتم ،،

إعمل فولو للعثمان على تويتر بقى :D
https://twitter.com/#!/ahmed_3osman

Share/Bookmark

الأحد، 5 فبراير، 2012

المجلس العسكري و " بيض " البلهارسيا ..


المجلس العسكري عبارة عن بيضة بلهارسيا عملاقة .. ده بالظبط الدور الي هو بيقوم بيه في مصر ...
إزاي ؟!
أكمل قراءة التدوينة ..


Share/Bookmark

الثلاثاء، 24 يناير، 2012

إنتم بكرة نازلين ليه ؟!




إنتم بكرة نازلين ليه ؟!
ده سؤال غبي .. سؤال سخيف ..
سؤال ميتردش عليه ..
لكن هرد ..
معلش يعني ..
العرف بيقول الغبي ردّوا عليه .. وفهموه ..
ولونوا مش فاهم اساسا ثورة دي .. معناها ايه ..
كان يوم عظيم في تاريخ بلدنا ،
وصنعنا فيه المجد لكن بإجتهادنا ،
في عيال بتلعب في الحواري ،
في القطورات ع الكباري ..
في الزبالة في المجاري ..
اصل الأهالي في السجون ،
فيه الي عينو بتوجعوا ..
وفيه الي مش عندو عيون ..
والي ابنه مات شهيد ،
والي بنته اتجوزت علشان فلوس راجل كبير عايش في أيام العبيد ..
والي بيعاملوه كنكتة لأنه عايش في الصَعيد ..
والي ماتلو رب اسرة ..
والي مرمي ضناه لقيط ..
والي يتعامل بقسوة لأنه كان راجل بسيط ..
والي صار معتوه بيهذي في الشوارع م العذاب ..
والي فقرو خلى عيشتو زي عيشة الكلاب ..
والي ذلّوا بيه وباشا لاجل رشوة .. او تحية ..
او اي حاجة .. بأي اسم .. تخلي عينك تنكسر فتخلي نفسك مش قوية ..
وكل شخص ادمرت قوة ارادته بالوهن ..
وكل واحد شاف مراته في قسم شرطة بتمتهن ..
ولكل مسلم ..
او مسيحي ..
اجبر انه يسب دين ..
يضربوه فيقول آمين ..
ويقول كلام في جناب مبارك ..
أستغفر الله العظيم ..
والي بيخاف م الحكومة ، خوفه مرضي ..
والي حبه لمصر اصبح للأسف اوي حب عرضي ..
والي مش لاقي اللضا ..
والي مسروقة حقوقه وبردو راضي بالقضى ..
والي حتى كل ألم .. والي كفنه كان علم ..
والي بيعيش في الشوارع دمعته على خده نازلة ..
والي مش عارف يعيش اصلا .. وبلده لحلمه خاذلة ..
والامهات الي بتتشحطط عيالها عشان جنيه ..
والي مش لاقي الجنيه ..
والي بيموّت اخوه علشان جنيه .. 
ياااادي الجنيه ..
الشعب ساب الأزمة ساب المشكلة وقعد يدوّر ع الجنيه ..
بس الجنيه في جيب الزعيم ..
والشعب كل الي بيقدر ينطقه عاش الزعيم يحيا الزعيم .. ده معاه الجنيه ..
والي يفكر غير كده .. راح يمسكوه .. ياخدوه على السجن الي تحت الأرض علشان يضربوه ..
فيعلموه .. إنو حرام يعمل كده ، علشان ميزعلش الزعيم .. ياااادي الزعيم ..
بس الشباب طالع بيفهم للأسف ، نفسه يولع في الزعيم .. 
نفسة يحس بمعني كلمة حر لو مرة في حياته ..
نفسه يدوق طعم الجنيه .. وباتون ساليه .. 
وحاجات كتيرة عايشينها اولاد النظام ..
واحنا ولاد الإييه .. ملناش الا ضرب الجزمة .. وبناءًا عليه ..
قمنا بثورة .. مش ضد بس نظام غبي .. قاعد بيسرق مية سنة ..
مش ضد بس رئيس حمار .. وحكومة فيها دماغ همج عاملين تمام زي التتار ..
ولا ثورة ضد الأغنيا الي بيغتصبوا الفلوس وبيسرقوا منا جميع ما نملكه .. 
حتى العرق .. باعوا العرق ..
باعو الجلاليب للأجانب .. 
باعو حتى البندقية والتروس ..
والثورة بردو ضد كل الي بيرضو بذلنا ..
عرابي قال من كام سنة .. 
والله ماحنا في ارضه تاني نكون عبيد ..
بس الكلام ده راح هدر ..
علشان في ناس رضيو يكونوا في ارض رب الناس عبيد ..
ميعرفوش ان العبودية لغير رب العباد بتكون حرام ..
والله يا اخونا حرام ..
بس المهم عملنا ثورة .. وكل دول قالوا خربتولنا البلد ..
طب هي فين بس البلد ؟!
وهي دي كانت بلد ؟!
قاموا قالوا ده خروج عن ولي الأمر .. 
والخروج شرعا .. حرام ،،،،
طب هما يعني يدفعونا تمن وضوئنا ومش حرام !؟
طب هما بردو يكفرونا في السجون وماهوش حرام ؟!
طب يسحلوننا في الميادين ؟! .. عريانين ؟! .. وماهوش حرام ؟!
طب يعملولنا فن هابط .. فن واطي .. عري واباحية وسفالة .. وبردو هنقول مش حرام ؟!
طب يقتلوا في شباب صغير ؟! .. شيوخنا بردو للأسف أفتوا إن دوَّت مش حرام .. ؟!
ناقص يقولوا إن الركوع قدام رئيسنا .. مفروض علينا ومش حرام ..
بس المهم عملنا ثورة ، وانتصرنا ع النظام .. 
رجعوا قالولنا مش حرام .. 
واحنا معاكو م البداية .. وجنودنا كانوا جنبكوا ..
ضد النظام وقفوا يحاربوا في صفكوا ..
ربطوا العدالة باسمهم .. وحموكوا قال من نفسهم !!
وقالولنا ست شهور ونمشي .. واقتنعنا بكدبهم .. 
قالولنا ست شهور ونمشي .. وإحنا زي الهبل قلنا ستة ستة .. 
والي ألهمنا الرضا تلاتين سنة .. يلهمنا ستة ..
والستة عدّوا .. وستة غيرهم بردو عدّو ..
ونزلنا تاني .. غنولنا تاني .. نفس الأغاني ..
قالوا خربتولنا البلد .. وحرام كده ..
جتكم مصيبة في جهلكم ..
انا جاي بس اقولكم ..
احنا هننزل للي عاملين زيكم ..
وانتم علينا بتحقدوا ..
جتكم مصيبة في حقدكم ..
إحنا هننزل للي عاملين زيكم .. :)


فولو مي على تويتر :)
http://www.twitter.com/ahmed_3osman


Share/Bookmark

الأحد، 22 يناير، 2012

انا مش نازل يوم 25 ، عشان حرام ، بالصوت والصورة !


تلك التدوينة اللعينة ( مش لعينة اوي يعني ) جابت اعلى لايكس وتويتس في المدونة :D
فقررت أسجلها .. وأديني بجرب حظي في الموضوع ده :D

مش هطول :) شوف الفيديو :
ولايك وشير بغباااء :D
دمتم ،،

Share/Bookmark

الأربعاء، 18 يناير، 2012

تدوينة عن الخيار !


ربنا خلق الإنسان في الأرض عشان يعمرها ، إدالوا نعم كتيرة .. زي السمع والبصر والخيار والحركة وكده :)
ومن الواجب علينا كبشر إننا نستعمل الحاجات دي في الخير وفي الصح .. منعملش بيها حاجة غلط ومنسمحش لحد يستغلها ..

من منظور شخصي ..انا شايف إن أهم حاجة لازم نحافظ عليها كويس .. الخيار .. 
انا كعثمان .. مستعد افضل احارب طول حياتي في سبيل إني أملك الخيار .. وأتحكم فيه .. لأنه من أهم الحاجات في الدنيا .. بجد !
هحاول امتلك الخيار بتدوينة .. بس يا رب اعرف ..


لو مش فاهم حاجة ، أكمل قراءة تدوينة :)
( ملحوظة : لو فاهم أكمل برده .. ولونّي اقطع دراعي مانتش فاهم D
: )

ملحوظة : هذا الخيار ملهوش دعوة خالص بموضوع التدوينة .. والصورة محطوطة غلطة تدوينية ..
بالذمة فيه خيار على شكل نجمة ؟!

Share/Bookmark

الثلاثاء، 10 يناير، 2012

كلام جرايد ..

قبل الثورة أنا مقريتش جرايد خالص .. كنت حاسس انها حاجة قذرة عيب اني استعملها :(
بقت مجرد طريقة " لتلميع " الحاكم على رأي " حيلهم بينهم " ..
اسلوب نفاق رخيص وبشع :)

وبعد الثورة نظرتي زادت استحقار ، كنت مفكر الثورة هتعدلها .. بس بما إن الثورة لسا مخلصتش .. فالجرايد لسا زي ما هي ..
( ملحوظة : يسقط يسقط حكم العسكر ) ..

المهم ،، وانا قاعد على تويتر بحاول افهم منه ايه حاجة .. لقيت الموقع ده بالصدفة وعجبني أوي :) فكرة فعلا جميلة ..
إسمه تاريخ صحافة مصر ..
فكرة الموقع ( زي ما انا فهمت ) .. إنه بيجيب صور من مقالات ومنشورات كانت في الجرايد القديمة في تاريخ مصر ..
عجبتني جدا فيه حبة صور هحطها في اخر التدوينة .. 
( ملحوظة : بالفعل إحنا في آخر التدوينة :)

اكمل قراءة التدوينة :) شوف لنك الموقع وأكتر حاجات عجبتني فيه ..

Share/Bookmark
rss