الجمعة، 21 أكتوبر، 2011

فين منين يودي فين !! (حكاية ثورة :)

صدق أو لا تصدق .. وأنا ماشي في الشارع سمعت واحد بيقول "فين منين " عجبتني الكلمة .. وعملتها مطلع لقصيدة .. بتتكلم عن قصة الثورة المصرية في صورة ساخرة وفي الأخر توقع بسيط للمستقبل .. بس توقع متفائل شوية :)

لقراءة القصيدة أكمل قراءة التدوينة :)

فين منين يودي فين
مش هكون بين البينين
عندي حلم وحلمي عارفه
ومش هيجي من يومين
ناس تقول وناس تعيد
كنا عايشين كالعبيد
كنا نشرب مية فاسدة
ونزلط الحجر الشديد
قولت يوم يسقط نظام
ضحكوا قالوا : يا سلام
صفحة ع الفيسبوك خلت
كل دولا بتوع كلام
رحت ووقفت في ميدان
كان بربي في إيمان
والإيمان لو كان سلاحنا
كنا فزنا ومن زمان
والعساكر وقفوا كوم
والي ماتو برده كوم
بالرصاص الحي خدنا
وللأبد رحنا في نوم
سيبو علينا الجمال
وبأوامر من بغال
طلق قناصة سعته
كان علينا بالوبال
وبعد إسبوع إنتصرنا
وبمحاكمة قد أمرنا
بس مسكتنا العساكر
فوق كده إحنا صبرنا
شهر عدى وشهر فات
كام شهيد في الشهر مات ؟!
والرسايل نازلة تعكس
كل باقي الرسالات
كلّ الثوري ومل وقال
إسمع يا إبن الناس .. العال
سبيك منها وامشي بسرعة
مش طالبين غير الترحال
والثوري دهوَّن تاني يوم
اتلخلخ من وسط القوم
وامه بتمشي تنادي عليه 
في الشارع اه يا عيب الشوم
طلع الشعب وقام بمظاهرة
نحن نريد حكومة طاهرة
ورئيسا ويعين نائب
شغله إنه يسليه في السهرة
أحسن ما بيتسلى علينا
ويسرقنا ونشوف بعنينا
الظلم بيتكلم عبري
وبيربط بحبال في إيدينا
تاني يوم مش لاقيين الناس
قفلوا عليهم بالترباس
في الزنزانة أترص الشعب
شاكب راكب بالحباس !
ورسالة ومكتوبٌ فيها
من عم الثورة وحاميها
للشعب الأمور النايتي
إخشع ياض ده انا واقف فيها
قام الشعب اتعفرت طار
وميداننا رجعلوا الثوار
وإعتصموا 15 يوم
علشان ياخدوا لمصر التار
والناس كات بتقول خربوها
دول ناس تعبانة وتعبوها
والعجلة أهي واقفة وبدَّالها
الي مطلع عين الي جابوها
مربوط بصامولة ومسمار
زنجة زنجة دار دار
وعشان تِحمى الفتنة وتتقل
ولع ياض في كنيسة بنار !!
وإنسبها لشباب الثورة
خلي المجد عليهم عار
تاني جابولنا حمير وبغال
وإشتغلونا شغل عيال
لكن خدنا مناعة وقلنا
لأا .. وهنحقق أمال
وهنكسب وهتكسب مصر
هنقعد ريس في القصر
لكن ريس عارف إنو
راح يبعد شهاوته عنو
وهيرفعنا لغاية فوق
وإحنا معاه ومش لابسين طوق
بنمجد فيه طول ماهو كويس
وهنرفعه ع الراس بالزوق
وإن يوم فكر يلعب فيها
يبقى حياته الجاني عليها
يبقى هيعرف معنى الثورة
وهياكل منها ويدوق 
وهياكل منها ويدوق
:)

أحمد عثمان - 20-10-2011 

Share/Bookmark

ليست هناك تعليقات:

rss