الاثنين، 21 نوفمبر، 2011

ثورة ثورة يا قاع الهامور !! ( إقتلوا سبونج بوب ! )

تدوينة جديدة .. مش بتتكلم عن الثورة المصرية في إطار ساخر .. مش هتتريأ ع الجيش .. مش بتقول عن الرئيس مبارك حاجة وحشة .. 
أو ببساطة .. هتعمل كل ده !



قاع الهامور للي مش عارف : المدينة الي بيعيش فيها سبونج بوب (bikini bottom) ..
وبالنسبة للي مش عارف سبونج بوب ..
 إنت مكنتش طفل ولا إيه !
اهو سبونج في الصورة تحت :)



لو عاوز تعرف الحوار ده كله ؟! أكمل قراءة التدوينة :)

---------------------=================--------------------

( ملحوظة ملهاش اي ستين لزمة : سبونج لا يرمز بأي شكل من الأشكال للمجلس العسكري .. _ أو عادي ممكن يرمز بردو :) _ )



في يوم رائع وجميل ( هنقلبها قصص أطفال بقى ! ) كان سبونج بوب رايح الشغل كعادته الهباب وماشي يقول زي الهبل .. أنا مستعد .. أنا مستعد :(
وسبونج بيشتغل طباخ في مطعم إسمه مقرمشات سلطع .. سلطع ده إسم صاحب المطعم طبعاً ..
مش عاوز غباء ،،

( ملحوظة مقصدش بيها أي حاجة خالص : تم إفتتاح مقرمشات سلطع  14 أكتوبر 1981 )
كانت الناس كلها مبسوطة ومبتسمة وسعيدة .. وكله تمام ..
كل واحد بيصحى الصبح يعمل الحركات اللولبية الحلزونية بتاعة الكرتون دي وهوب تلاقيه لابس هدومه ورايح الشغل .. ووقت الغداء يروح مقرمشات سلطع يتغدى .. 

الناس كلها .. ما عدا واحد !
شرير .. لئيم .. مبيبحش الخير لحد .. 
عاوز يبقى غني بأي طريقة .. وفوق كده قصير ! 
شمشون !

( ملحوظة مقصدش بيها أي حاجة بردو : شمشون كان بيشتغل في فرقة موسيقية ! )
شمشون ده بقى كان حقودي وغلاوي .. وعاوز يودي سلطع في داهية .. فقرر يضحك عليه ويفهمه إن قاع الهامور ده حق من حقوقه الشرعية .. ويخليه يعيش في دور الملك ويستعبد المواطنين ..

وسلطع لأنه أصلا من جواه بيموت في الفلوس .. إنضحك عليه وفهم إن هو الكل في الكل .. بقى حوت من حيتان قاع الهامور .. يسرق في دم الغلابة .. وينهب الي يعوزه ..
( سلطع مش حد تاني متودوناش في داهية :)
وشمشون وراه هو وحاشية شغالة سرقة ونهب و ظلم ..  الله ينور  .. ويزيدوه في وهمه أكتر وأكتر ..
والشعب مشغول في سلطع برجر .. بياكل وسايب الي يسرق يسرق !
وفضل قاع الهامور على الحال ده تلاتيييين سنة !
وشمشون قاعد بيحتكر منتج بعد منتج .. ويمص دم واحد بعد واحد !!

وفي يوم .. حصلت حادثة بشعة :(
إتقتل عادل وحيد ( ركزوا إسموا عادل مش خالد :)
اتنين مخبرين في وزارة الداخلية ( الداخلية بتاعة قاع الهامور طبعاً) طلعوه من مقرمشات سلطع .. وسحلوه لغاية دلو الصداقة ( محل مجاور ! ) وقعدوا يضربوه لغاية ما مات :'(
وبعدها بكام يوم إتعملت صفحة على الفليببوك ( زي الفيسبوك كده ) إسمها كلنا خالد ســ .. يووه .. كلنا عادل وحيد :)
وبدأت الأمور تتطور على منحى رهيب .. الناس بدأت تحس بفساد سلطع وشمشون .. هوب .. بدأت تنقده .. هوب .. في ناس إتسجنت .. هوب .. راحوا عاملين ثورة .. !!

والناس بدأت تتجمع في ميدان البرميل ومعاهم سبونج بوب طنطاوي بانتس .. وبدأوا يهتفوا ضد حكم سلطع ..
كان فيه جوه ميدان البرميل ناس كويسة بجد بتخاف على بعض .. لو نزلت ميدان البرميل هتلاقى دولة صغيرة جوه الدولة .. دولة لو سمكة فيها خبطت فيك هتقولك أسفة.. ولو حد عايز يعدى هيقولك بعد إذنك.. ولو حد عايز يشوف بطاقتك هيقولك معلش إحنا مضطرين.. تسمع كتير فيها كلمة حاسب علشان السمكات تعدى مفيش فيها معاكسة أو تحرش.. لما السلمون بيصلى القرش بيحمى ضهره.. ولما القرش بيصلى السلمون بيحمى ضهره.. كانت صورة من قاع الهامور الي هما نفسهم فيه :)
فضلو معتصمين كتييييييير جدا !!

لمدة تمنتااااااااااشر يوم !!
داقوا فيهم كل أنواع الذل والعذاب .. على إيدين امن الدولة وسلطع الي بعت ناس تقوم باعمال البلطجة والتخريب عشان يحاول يشوه صورة المتظاهرين في ميدان البرميل :(

لكن الإرادة الشعبية الهائلة وبمساعدة سبونج إلي سموه ساعتها " حمى الثورة " قدروا مع بعض يسقطوا حكم سلطع ويقبضوا على رموز نظامه ... شمشون صاحب مصانع شمشون الدخيلة .. زهير تونة .. والأخطبوط المسئول عن كل القمع والتخريب أيام ثورة قاع الهامور .. خطيب العادلي !

المهم يعني إن الثورة إنتصرت .. وسبونج بوب هيأمنلهم فترة إنتقالية للحياة الجميلة الهادئة السعيدة .. ( ده باوامر من سلطع ! )
وكلهم طبعا فرحوا بيه ورفعوه على راسهم من فوق ..

كان بمثابة المخلص من 30 سنة فقر وذل وعذاب .. قبل ما تبقى صدمتهم في أمه سودة !

سبونج فترة حكمه مختلفتش كتير عن فترة حكم سلطع ..
الأسعار زي ما هي ..
الفساد زي ما هو ..

في الأول .. طلع للناس يحيهم على الثورة ويحي الشهداء .. وعملهم تعظيم سلام !

وعمل لسلطع الي كان قارفهم محاكمة عادلة .. أو مش عادلة بقى ماهي محاكمة والسلام !

بس بعد كده .. رفعلهم صباعه !

قراراته بقت بالقطارة .. ميحكمش غير لما يعملوا مظاهرات ..
بقت صورة من عهد سلطع مفيش أي فرق ..
وشوية وسبونج حب السلطة .. بقى عاوز يفضل الحاكم على طول ... قعد بقى يتماطل ويتمايع عشان يفضل هو الحاكم ..
لكن الشعب نزل تاني ميدان البرميل .. عشان يسقطوا خليفة سلطع .. الي كان بيمص دم المواطنين ..
كان عاوز يركب الثورة وياخدها لنفسه .. بس على مين ؟!

وعملوا ثورة أشد من الثورة الأولانية ..


بس المرة دي سبونج مش هيسقط ولا هيتحاكم .. المرة دي سبونج هيتقتل
عشان شعب قاع الهامور الى عامل ثورة قبل كده من أعظم ثورات العلم .. والي أثبت لكل الناس انه حر ومش مممكن يستعبد
مش هيجي حتة عسـ .. طباخ زي سبونج بوب يستعبده ويذله ..
وعمليات القمع الي بيقوم بيها سبونج ضد المتظاهرين في ميدان البرميل ..والسمك الي بيتقتل ويترمي جنب الزبالة ..
والمدرعات الي رايحة جاية تدوس وتدهس في السمك ..

ده كل مش هيروح هدر ،،

يسقط يسقط حكم سبونج !


-------------------------
أتمنى تكون الرسالة وصلت :)
وأتمنى أعرف رأيكوا في التدوينة :)


دمتم ،،

Share/Bookmark

ليست هناك تعليقات:

rss