الثلاثاء، 13 مارس، 2012

علمونا في مدرستنا .. نكون حمير !!

تدوينة عن التعليم .. وانا بتشقلب في الفيسبوك لقيت كليب اسمه علمونا في مدرستنا ، على صفحة الفنان المثقف المحترم عمرو مصطفى ( #$%#% ! ) .. ونزلت دمعتي !
أبدأ منين بس ؟! كليب مستفز جدا .. مستفز بدرجة مشير !
والي استفزني اكتر ان الناس انضحك عليها فعلا وعجبها الكليب وبدأت تشيره .. زي ما بنحب اغنية حافظ على ولاده بالظبط !
بغض النظر عن الكليب ده بشكل او بآخر بيحاول يصلح من صورة المجلس العسكري الي هي اصلا زي الزفت ..
مفيش ولا كلمة صح ..
التدوينة عن مدرستي وعن الي اتعلمته منها .. وصدقني لو مشفتهاش تبقى متعرفش حاجة عن التعليم في مصر !

تنويه :المدرسة الي اتصور فيها الكليب هي مدرسة نفرتاري الألمانية الدولية ومصروفاتها 27 الف جنيه سنوية .. وده _ كما نعلم جميعا _ مبلغ متوفر في جيب اي مواطن مصري!


لا قدر الله لو التدوينة وصلت لإدارة المدرسة ابقوا افتكروني بالخير واعملولي فولو على تويتر :D


صدق او لا تصدق .. حوش مدرستي !
----------------
قالك علمونا في مدرستنا ؟! ..

-أنا في مدرستي دي اتعلمت إزاي استعمل الحمام من غير مية ..
-إتعلمت إزاي لما ابقى في الفترة المسائية مصليش الضهر والعصر ..
-إتعلمت إزاي اتبلطج على المدرس وإزاي اشتمه ..
-إتعلمت ازاي ادعم المنتج المصري وأشتري لفاليف من الباعة الجائلين الي في الحوش ..
-إتعلمت إزاي احل الامتحان مرتين مرة ليا ومرة لزميلي الي غايب ..
-إتعلمت إزاي افرق بين 2 طلاب لمجرد ان ده في فصل المتفوقين وده لا ..
-إتعلمت إزاي أنط من على سور ارتفاعه 3.5 متر من غير ما هدومي تتوسخ ! ..
-إتعلمت إزاي أدي البواب خمسة جنيه عشان يديني النتيجة من غير ما اتلطع كام ساعة !..
-إتعلمت ان اي حاجة هتتعملي لمجرد ان بابيا بيشتغل هناك .. او بيشتغل في جهاز الشرطة !
-إتعلمت إزاي أثبت زميلي وأخد منه قلم جاف عشان نسيت بتاعي ..لمجرد إن انا طويل وهو قصير !
-إتعلمت الإنتظام في المواعيد .. بدخل المدرسة الساعة 9.30 وبطلع 10.30 !!
-أتعلمت أزاي مقفش في طوابير ..لأن المدرسة مفيهاش طوابير أصلا !
-إتعلمت إزاي لما اتخنق من المدرس انزل ارنّ انا الجرس !
-إتعلمت إزاي أخد درجات اعمال السنة بعلبة طباشير !
-إتعلمت أزاي امشي في مظاهرات .. وإزاي اهتف في الحوش : " خليك فاشل في الثانوية .. آخرك هات خمسين في المية ! "
-إتعلمت إزاي اسرق وايرلس عشان اعد اتويت وانا في الفصل .
- إتعلمت إزاي اشحن الموبايل من الفيشة الي في آخر الفصل من غير ما المدرس ياخد باله .
- إتعلمت إزاي اشتم زميلي بابوه وأمه قدام المدرس الي غالبا هيبصلي وياخد نفس من السجارة وبعدين يبص الناحية التانية .
- إتعلمت إزاي أدخل المدرسة من على السور علشان البوابة قافلة !
- اتعلمت ازاي ادخل من السور التاني الـ 6 متر لو في مدرس واقف على السور الأولاني ! .
- إتعلمت إزاي اتحول في ثانية لطالب محترم عشان في لجنة من الوزارة جوه المدرسة .
- إتعلمت إزاي ارقص شعبي ! .-إتعلمت إزاي لو ب
- إتعلمت إزاي اعد ساكت في الفصل عشان مشرفة الدور الي في الاوضة الي جنبي متغلسش وتجيبلنا مدرس ! .
- إتعلمت أزاي اكون _ للأسف _ حيوان ووسـ* وخـ** ! .
- إتعلمت أزاي لو اتجندت في الامن المركزي امسك عصاية اطول مني زي وكيل المدرسة واضرب بيها اي حد .
- إتعلمت إزاي ازق واحد تاني اوقعه عشان اعد مكانه لأن الفصل فيه ستين واحد !.
- إتعلمت أسأل المدرس أسألة ملهاش لزمة لمجرد إن الفصل كله يضحك عليه ويبقى منظره مهين !.
-إتعلمت إزاي اجيب قلم حبر سري اكتب بيه الغياب عشان اعدله براحتي في آخر اليوم .
-إتعلمت إزاي ادفع خمسين قرش لعم السيد _ طالب ! _ عشان انط من ع السور قبل المعاد بتاع النط الي هو قبل معاد المرواح !!.
- وإتعلمت حاجات تانية كتير اكيد مش هيشرفني في يوم إنها تبقى فيا .. وأكيد مفيش ملحن دكر هيطلع يقولها في أغنية وأكيد هتفضل الاجيال من بعدي تتعلمها لغاية ما الاقي ابني في يوم بيكتب عنها .. وأكيد مش هيطلع منها غير اجيال بايظة متعرفش تعمل حاجة .

دي شوية صور صورتها من المدرسة عشان تشوفوها .. .. للأسف !
نط جماعي من على السور !

مخزن الروبابكيا الأكبر .. حوش المدرسة !

الناحية التانية من مخزن الروبابكيا !

صورة بانورمية للفصل الساعة 9 ..قبل ما الطلبة يشرفّوا !

خرم في سور المدرسة عشان نحط رجلنا فيها واحنا بننط ندخل جوه !
صورة تانية للخرم ومكتوب ساهم في بناء المستقبل ..مستقبل ايه الله يخربيوتكوا !

تاكسي في حوش المدرسة ( مخزن الروبابكيا )اثناء الفسحة .

( بص ع التاكسي ) .. بجد لا تعليق !
مش بقول كده عشان اشوه صورة المدرسة او اي حاجة من دي ..ابسلوتلي نوت ..بس انا نفسي اني اتعلم تعليم محترم .. وحشني اني اقف في طابور .. نفسي اني اسمع اذاعة .. نفسي احضر حصة .. نفسي يبقى ليا معاد اروح فيه ومعاد اجي فيه .. نفسي اتعلم !

مش عارف مصير التدوينة ايه وهل الناس هتهتم بيها او لا .. بس اتمنى انها تصلح الصورة الي خدتها الناس عن مدارس مصر من الكليبات الي كل شوية تتصور في مدارس مصروفاتها لطالب واحد .. بتعيش اسرة كاملة حوالي عشرين سنة .. دي مدارس مصر الحقيقية .. ده التعليم المجاني .. دي وزارة التربية والتعليم .. !

دمتم بود ،،
( اول مرة اقول بود دي :D)


اهم حاجة الشير ، عشان الرسالة توصل =)
لو مش عارف تشير اللنك شيرها من الصفحة دي ..
http://www.facebook.com/histiryaa/posts/344975198879248 




Share/Bookmark

ليست هناك تعليقات:

rss