الأربعاء، 16 مايو، 2012

كلمات مش عيب ( كلام بنقولو ومش عارفين معناه ! ) الجزء الخامس

من اكبر المشاكل الي بيعاني منها الشعب المصري لسانه ، معلش بقى ومن غير زعل احنا شعب بيحب الكلام وبنتكلم اكتر ما بنعمل .. مش دي المشكلة الموضوع ممكن يتاخد بطريقة ايجابية الثورة نفسها جاية من الكلام ! لكن المشكلة لما نقول كلام احنا مش فاهمين معناه .. هتقولي إزاي يعني ؟! طب خد عندك دول .. انت لما بتحصل مشكلة بتقول يا خراشي او يا لهوي .. عارف يعني ايه يا خراشي ؟! طب لما واحد يقول لواحد يا ابن " الإيه " .. الإيه ده عبارة عن إيه ؟! طب يعني ايه خرونج ؟! طب لما بتقول كوسة على حاجة .. اشمعنى الكوسة ؟! اكيد مش حل المشكلة اننا نمنع الناس تتكلم .. اكيد لو حاولنا نعمل كده هيعملوا ضدنا ثورة ! .. لكن ان الناس تفهم معنى الكلام ده اكيد هيبقى احسن .

كتبت قبل كده اربع تدوينات في الموضوع ده هتلاقوهم ف الصفحة دي :)

دورت على معاني كلام كتير وإزاي الكلام ده بقى في لغتنا .. وجبت كلمات من اللغة المصرية القديمة ولغات تانية ولسا لغاية دلوقتي موجودة على لسان الشعب المصري ! وجمعتهم ف سلسلة تدوينات كلمات مش عيب .. ودي التدوينة الخامسة :)
المرة دي هعرفكم معنى " فضيحته بجلاجل ، التالتة تابتة ، خرونج ، كاني وماني ، الحابل والنابل ، منا خوليا "
بالإضافة لكلمات مباشرة زي : " بس ، دستة ، طشت ، قرطاس ، كخ ، حدوتة .. إلخ "



أكمل قراءة التدوينة :) 

فضيحته بجلاجل :
الجلاجل في المعجم هي الأجراس .. وظهور الكلمة دي ليه قصة بردو .. كان زمان عقوبة المجرم انه بركب حمار ومعاه ظباط شرطة يدقوا الأجراس عشان الناس تشوفوا فيعرفوا انه مجرم .. وتبقى فضيحته بجلاجل !
وظهرت من مشتقات الكلمة دي إنت هتجرسني ؟! .. انت جبتلي جرسة .. الخ الخ 
------
التالتة تابتة ! :

فى الحرب العالمية التانية .. صدر أمر عسكرى بإن محدش يولع سجاير .. وفرضا ان واحد ولع فميولعش للتاني وللتالت .. لأن لو واحد ولع السجارة مكانه هيتعرف من النار وممكن ينضرب لكن الطلقة مش هتيجي فيه .. ولو ولع للتاني يبقى فيه احتمال ان الطلقة تيجي فيه .. ولما يولع للتالت يبقى اكيد كده الطلقة هتيجي فيه .. ومن هنا ظهرت كلمة : التالتة تابتة .
-----
خرونج :
طبعا كلنا فاكرين المشهد ده من مسرحية شاهد ماشافش حاجة .. وقالي كلمة واحدة .. قالي يا خرونج .. يعني إيه خرونج يا سرحان ؟! مش عارف .. مش انتوا الحكومة .. مش الحكومة عارفة كل حاجة ..
اتضح فعلا بعدها بسنين ان الحكومة من خلال أمن الدولة عارفة كل حاجة .. مش ده موضوعنا .. لكن مين فعلا عارف معنى كلمة خرونج ؟! خرونج معناها اصلا الخارج من المنافسة او الي ملهوش قيمة ..
-----
كاني وماني :
كلمتين تقريبا شبه بعض .. كاني معناها في اللغة الفرعونية السمنة وماني معناها العسل .. لأن المصريين زمان كانوا بيقدموا لكهنة المعابد سمنة وعسل _ظنا منهم _ انهم هيقضوا حوائجهم وكده .. وممكن بردو يكون معناها اختلاط الكلام في بعضه وإنه بقى مش مفهوم .
-----
الحابل والنابل :
والكلمة أصلها من المعارك القديمة .. الحابل هو الي بيمسك حبال الأحصنة .. والنابل هو الي بيرمي السهام .. ولما المعركة بتشتد بيختلط دول على دول .. دلوقتي الكلمة بتتقال كل لما مشكلة تتفاقم وتكبر وتختلط حقائقها .
-------
منا خوليا 
عبارة عن حالة عقلية موجودة في بعض الأمراض العقلية والنفسية وبتتميز بالإنطواء والقلق ورغبة الأنتحار اسمها الحقيقى ( ماليخوليه ولكن طبعا الشعب المصري خلاها مناخوليا بقدرة قادر ..
-------


كده تقريبا معدش عندي كلام بيتقال ومش عارفين معناه وليه قصص او اصول تاريخية :) لكن ده مجموعة كلمات بنقولها بردو وسببها هو اختلاط اللغات وكده ..


بس : كلمة فارسية اصلا بمعنى اسكت .
دسته : كلمة فارسية بردو ومعناها حزمة .
طشت : كلمة فارسيه معناها إناء الغسيل .
قرطاس : كلمة يونانيه معناها ورق .
كخ : لفظ فارسي بردو كان بيتقال عشان تخوف بيه الأطفال .
حدوته : كلمة محرفة من كلمة أحدوثة .
كتكوت : مشتقة من فعل ( كتكت ) ومعناه في المعجم الي بيمشي بسرعة ويقرب خطواته .. وده انسب وصف لمشية الكتاكيت .
النجفة : السبب في التسمية دي ان أول نجفة جت مصر كانت جاية من مدينة النجف العراقية .. المصريين سموها نجفية نسبة للمدينة .. ومع الوقت اتحورت لنجفة .
أبلة : كلمة تركية الأصل .. وبتتقال احتراما لحد اكبر منك في السن او لأختك الكبيرة .
أوضة : كلمة تركية معناها الغرفة .
بابا غنوج : كلمة تركية الأصل ومعناها الحرفي بتنجان بالطحينة ! .
بانيو : كلمة تركية الأصل ومعناها حوض الحمام .
برطمان : كلمة تركية بردو ومعناها الإناء الزجاجي .
شنطة : كلمة تركية ومعناها الحقيبة .
شوربة : كلمة تركية معناها الحساء .
طابور : كلمة تركية معناها الصف.
ماسورة : كلمة تركية معناها الأنبوبة.
لسا : أصل الكلمة دي إنها جزء من كلمة " للساعة " ومعناها ان ده لسا محصلش لغاية دلوقتي .


لو لقيت كمان مصطلحات غريبة أكيد هعمل جزء سادس مش هتأخر عليكو :)
شير ع الفيسبوك وتويت على تويتر وفولو مي والحاجات دي :D
https://twitter.com/#!/ahmed_3osman
دمتم ،،


Share/Bookmark
rss