الأربعاء، 18 يناير، 2012

تدوينة عن الخيار !


ربنا خلق الإنسان في الأرض عشان يعمرها ، إدالوا نعم كتيرة .. زي السمع والبصر والخيار والحركة وكده :)
ومن الواجب علينا كبشر إننا نستعمل الحاجات دي في الخير وفي الصح .. منعملش بيها حاجة غلط ومنسمحش لحد يستغلها ..

من منظور شخصي ..انا شايف إن أهم حاجة لازم نحافظ عليها كويس .. الخيار .. 
انا كعثمان .. مستعد افضل احارب طول حياتي في سبيل إني أملك الخيار .. وأتحكم فيه .. لأنه من أهم الحاجات في الدنيا .. بجد !
هحاول امتلك الخيار بتدوينة .. بس يا رب اعرف ..


لو مش فاهم حاجة ، أكمل قراءة تدوينة :)
( ملحوظة : لو فاهم أكمل برده .. ولونّي اقطع دراعي مانتش فاهم D
: )

ملحوظة : هذا الخيار ملهوش دعوة خالص بموضوع التدوينة .. والصورة محطوطة غلطة تدوينية ..
بالذمة فيه خيار على شكل نجمة ؟!
أولا : التدوينة ليه اسلوب معين مش عارف اسمه ومش هعرف اشرحه بس هي ليها اسلوب يعني :D
ثانيا : حاول تحس ان واحد فلول في حياتك هو الي بيقول الكلام ده ، هيبقى مش مقنع خالص :D
ثالثا : الخيار بفتح ال خ وملهاش علاقة بالخضار .. ده للي مش واخد باله او مقراش الجملة الي بخط صغير تحت الصورة ..
رابعا : الناس الي انا بتكلم عنهم هيقولوا ان التدوينة مش مفيدة وأسلوبي خارج ، متقولوش حاجة الرسالة وصلت ..
خامسا : هما اربعة بس مفيش خامسا :)
-----
-انظر ايها العجوز!
-هناك ملائكة قادمون!
-اي ملائكه؟ انهم بشر ملطخون بالدماء يشبهون التتار او الهكسوس
-لا لا دقق نظرك، انهم ملائكه في ايديهم حجاره و علي رأسهم كرامه و في قلوبهم شجاعه
-يا لك من احمق! انهم مجرمين في ايديهم حجاره و علي راسهم مذله و في قلوبهم جُبن
-ايها الرجل العجوز، ما هذه النظره؟ انظر ماذا يفعلون! ها هم قد اسقطوا الطاغيه!
-يا ولدي كنت مخطأً!
-لا تقلق ايها العجوز لقد سامحتك و هم سامحوك! و لكن انت معنا ضد الظلم منذ الان
-بالطبع انا معكم و لكن دعنا نشيد و نبني الوطن، و قد حمانا جنودنا الابرار!
-معك حق! هيا بنا!
و بعد مرور الزمن
-ايها العجوز! انظر ماذا فعل جنودنا! و ما فعلنا نحن ما نستحق عليه هذا الجزاء
-ماذا فعلوا؟ انهم يقومون بواجبهم، لقد قاموا بحمايتنا في وقت الحرب!
-حرب؟ اي حرب تلك؟ و هلي تعتقد ان حمايتهم لنا تجبرنا علي الخضوع؟ الم نتفق علي ان نكون ضد الظلم
-ولد طائش، نحن نريد الاستقرار و هم ابرار
-ابرار؟ انظر ماذا فعلوا! لقد كشفوا عورات النساء و قتلوا الاطفال، ثم الشيوخ، ثم الشباب الملائكه! 
-كلهم جناة  مجرمين يا ولد! انت احمق لا تعلم شئ
-لا بل انت المجرم! انت يا من ترفض الحريه باوهام ضالة!
-انت ولد احمق لا تعلم شئ! و قد مللت من حديثي معك، سأذهب لاتملق و اعبد صاحب السلطه!
لا دي مش حتة من رواية شكسبير ،،
 دي حتة من تدوينة الناشط السياسي المدون الأديب العبقري الواد عمر عبناصر :D

المهم يعني ، هتحدث عن الخَيار ..
ربنا خلق لكل إنسان دماغ يفكر بيه ، يعني كل إنسان عنده القدرة ع التفكير .. بيفهم .. بيعرف يختار لوحده .. يميز لوحده .. ولازم نحترم رأيه ..
كل الاديان السماوية إدت للإنسان حرية الرأي وحرية الخَيار ..
في الإسلام : {وَقُلِ الْحَقُّ مِن رَّبِّكُمْ فَمَن شَاء فَلْيُؤْمِن وَمَن شَاء فَلْيَكْفُرْ ... } _ الكهف 29 _
في المسيحية : { اُنْظُرْ. قَدْ جَعَلْتُ الْيَوْمَ قُدَّامَكَ الْحَيَاةَ وَالْخَيْرَ، وَالْمَوْتَ وَالشَّرَّ } _سفر التثنية 30: 15_
اليهودية : مش عارف .. هو انا بتاع كلو يعني ؟!

المهم إن كل الأديان إدت لكل واحد حرية الإختيار ، بس عرفته العواقب ومفرضتش عليه يعمل حاجة .. ربنا خلق كل واحد حر .. حر ..
بس للأسف في ناس مش قادرة تقتنع بكده .. وشالت على كتافها هم كبير .. إنها تفرض رأيها ع الناس .. ناس سابت كل مشاكل الدنيا وبقت بتدخل جوه تفكير جوه واحد عشان تغير فيه .. وتخليه زي ما هي عاوزة .. ناس مقتنعة إن هما بس الي صح ..
ناس بتقول في عقل بالها : " أنا بس الي عندي عقل ولازم افرض رأيي ع الناس عشان هما مبيعرفوش يفكروا ، لازم كل المجتمع يبقى صورة طبق الأصل مني ، لازم رأيي هو الي يمشي ، صوتي يبقى هو الصوت الوحيد المسموع " ..
ناس مش عارفين إن كل واحد ليه حرية الإختيار ، لازم يبقى متحكم في خَيارته .. عشان يقدر يتحمل عواقبها سواءا كانت حلوة او وحشة .. في النهاية دي حاجة ترجعله .. حتى لو اختيارته غلط مش لازم يفرضه رأيهم عليه ..

آنا بقول لكل واحد من دول .. على لسان كل واحد مش بيتحكم في خياراته .. بسبب ديكتاتور صغير مفكر ان هو بس الي بيفهم ..
انا ربنا خلقني مخَيَّر ..
انا بملك الخَيار ..
من فضلك متفرضش رايك عليا ..
هو انا لو عارضتك اكون كافر ؟!
ولا انت لوحدك الى بتفهم او انك انت بس الى بتعرف تفكر ؟!
طيب ما انا كمان فكرت .. وفكرت كويس ز. لكن مش متفق معاك فى ارائك
كل واحد فينا ليه وجهه نظر خاصه بيه ..
مين قال اني ملك لحد يفرض عليا سيطرته .. ؟!
ولا هو يأما اكون معاك وموافقك يأما اكون ( ... ) و ( .... ) ..
لا مش هسمحلك ..
معلش :)
(إنت تيجي هنا وستووب .. تعمل قت كده )

بس خلاص ،، كانوا كلمتين محشورين في زوري :D
إعمل لايك من فوق ربنا يجبر بخاطرك ، إنت معندكش عيال بلاستيك ولا ايه :( ؟
وإعمل كومنت من تحت الهي يا رب يجعل في حنكك سُكَّرة ..
حتى قول اي حاجة .. ده انا غلبان يا عيني :( وقال على رأي المثل .. كلمة جميلة تمنع بلاوي كتيرة :D

دمتم ،،






Share/Bookmark

ليست هناك تعليقات:

rss