أنا مش نازل يوم 25 ، عشان حرام ..

سواءاً كنت مؤيد للنزول في اليوم ده أو لا :) الكلام ده موافق تماما لوجهة نظرك ومؤيد ليها !! كلام ممكن نبصله من ناحيتين :\
بقالي تقريبا 15 يوم مدونتّش :( وطبعا محدش حس بحاجة >_< ورايا إمتحانات .. مع إني مبذاكرش أي حاجة بس عيب بردو يبقى ورايا امتحان واعد ادوّن :D
المهم ،،

حاولت أجمع في التدوينة دي كل الأسباب الي هتخلي البلد تستقر وحوار إننا ناكرين للجميل وإن المجلس حمى الثورة ( بصابونة ديتول على فكرة ) وإننا هنضيع البلد وحرام علينا وكفاية وخربناها وكده ..

وهقولكوا ليه مش هننزل يوم 25 :) في عشر نقط ..

( ملحوظة : مش هكتب أكمل قراءة التدوينة .. أكمل إنت  :)


( ملحوظة تانية : هذه التدوينة ليست تريأه )
..
1
هنبدأ من بدري شوية .. من أيام الثورة الي العيال بتوع التحرير عملوها ..
يوم 2\2 كانت موقعة الجمل ..
الجيش المصري وقف يومها وقفة مشرفة وقدر يقبض على كل البلطجية الي كانو هيموتوا المتظاهرين مع انهم كان المفروض يسيبوهم يموتوا .. من غير اصابة مدني واحد .. وطبعا في ساعتها الجيش قدر يقبض على الجناة الي كانو مستخبيين في منطقة المرج وعمل تحقيقاته وخلال 16 يوم عرف مين الي ورا موقعة الجمل ودفع غرامة 620 الف جنيه واتحكم عليه بسجن 25 سنة مع الأشغال الشاقة ..
المجلس العسكري كده مش يبقى حمى الثورة ؟!
مش لما قيادته تمنع المخطط ده وتحمي المصريين تبقى حمت الثورة ؟!
2
فاكرين مذبحة 9 مارس ، ومذبحة 8 ابريل ، ومذبحة السفارة الإسرائيلية ، ومذبحة أول يوم رمضان ، ومذبحة العباسية ، ومذبحة ماسبيروا ، ومذبحة محمد محمود ، ومذبحة القصر العيني ..
كل مرة كان البلطجية والأيدي الخفية والطرف التالت بيموتوا الناس ويضربوهم برصاص حي ومطاطي واسلحة ، وفي يوم جابوا جرانديزر الميدان ..
مين الي كان كل مرة يحمينا ويكشفلنا المخططات دي ؟!
مش التلفزيون المصري بردو ؟!
مش المجلس العسكري هو الي كان بيوقف المهازل دي ويحمي المتظاهرين والحمد لله الثوار الشرفاء كلهم بخير والبلطجية بس الي ماتو مع خساير في الجيش المصري .. بس الجيش حمى الثورة وقال انوا فداها :)
مش بذمتكوا حرام نهتف ضده ؟!
مش بذمتكوا الجيش حمى الثورة ؟!
3
نرجع تاني لإعتصام السفارة الإسرائيلية الي كان في ذكرى نكبة فلسطين ..
مش الجيش المصري راح تضامن مع المعتصمين ؟!
مش قال قدام العالم لإسرائيل إنها لو مسابتش فلسطين خلال فترة إنتقالية " ست شهور " هيخليها تسبها بالقوة ؟!
مش حمى المتظاهرين لما جم بطلجية يهود يضربوهم ؟!
مش افرج عن " 186 " شاب كانوا معتقلين جوه السفارة الإسرائيلية ؟!
بالذمة موقف مشرف للجيش كده مش يخلينا نحترمه ومنهتفش ضده ابدا ؟!
مش يخليه " وبجدارة " حمى الثورة ؟!
4
نرجع تاني لأحداث السفارة ، بس الي في سبتمبر ..
مش الجيش نبه تاني على اسرائيل انه عند كلمته ، وإن الفترة الإنتقالية زي ما هي .. وانها لازم تحاول بكل جهدها تطلع من فلسطين في اقرب وقت ؟!
مش الجيش افرج عن 65 معتقل تانيين لقاهم بردو جوه السفارة .. وقام بسرعة هد السفارة وسحب سفيرنا من هناك وقال انه معدش بيعترف باسرائيل كدولة وفضل عليها ابناء بلده ؟!
مش ده موقف يلخينا منهتفش ضده ابدا ؟!
مش ده يخليه برده حمى الثورة ؟! ولا إيه ؟!
5
طب مذبحة ماسبيرو 9 \ 10 
اكيد كلنا شفتنا المدرعة المسروقة الي دهست المصريين ؟! مش المجلس العسكري جابلنا صاحبها واعدمه قدام الناس عاشان ياخد بطار مصر ؟! مش المجلس العسكري اعتذر وعاقب الجندي الي اتسرقت منه المدرعة مع انهم وجدوه وكان جسمه كله مكسر من الضرب ؟!
يومها في اربعة وعشرين جندي باسل ماتوا برصاص البلطجية ؟!
مش كفاية كده عليه افترى و ظلم ؟!
 مش بذمتكوا حمى الثورة ؟! مش بذمتكوا حرام نهتف ضده ؟!
حرام عليكو البلد .. كفاية بقى ..
6
محمد محمود ..
المتظاهرين ( مش هما بتوع 25 يناير ) في الأيام دي عملوا بلاوي زرقة ..
استخدموا غازات سامة ضد الجيش .. والجيش التزم بضبط النفس بردو ..
في قلة مندسة جواهم قعدت تموت الناس بخرطوش .. والجيش فضل ملتزم بضبط النفس وحمى المتظاهرين .. على الأقل الي قدر يحميهم في اليوم ده ..
مش الجيش قعد يوزع على الناس الي كانت مش فاهمة ونازلة بحسن نية اقنعة حرب كيماوية عشان تحمي نفسها من الغازات ؟!
والي متظاهرين قابلوا ده باطلاق رصاص حي على الجيش .. والجيش بردك فضل ملتزم بضبط النفس ..
مات 1004 جندي جيش في الأحداث دي ..
ولسا عاوزين تنزلوا تاني تهتفوا ضد الي حمى الثورة وفضل ملتزم بضبط النفس طول الفترة دي ؟!
حرام :(
7
أحداث مجلس الوزراء .. ديسمبر ..
13 شهيد من صفوف الجيش ..
مواطنين مصريين كانو بيطرطروا ع الجيش :(
وبدأ العهر الإعلامي ..
فبركة فيديوهات عديدة ..
يعني مثلا في فلتر في الفوتوشوب اسمه " get it naked " .. الفلتر ده ممكن يعري اي واحدة .. وفي مصمم امريكي اسمه " الين الفقي " هو الي صمم الصورة بتاعة البنت الي اتعرت .. وبعدين كلموه قيادات 6 ابريل بعدها عشان يروح هوليوود يصور فيديو للموضوع ده .. والناس صدقت ان الجيش ممكن يعري واحدة ..
بعد كده استخدم نفس المصمم الشرير .. فلتر " es.7L " بيشتغل مع اداة " السهم تول " عشان يصمم اكتر من فيديو لسحل المتظاهرين ..
حاول التلفزيون المصري يوضحلكوا تقنية ال25 صورة في الثانية الي الين كان بيستخدمها .. بس الناس عاوزة تسمع اكاذيب بس :(

وبعد كده المتظاهرين حرقوا المجمع العلمي .. حرقوا تاريخ مصر .. حرقوا اهم حاجة في الوجود .. المجمع الي اهم من الناس .. مشفتوش ام الشهيد " الي الي البلطجية قتلوه " لما قالت مش عارفة هقدر إزاي اعيش من غير المجمع العلمي ؟!
انا قلبي اتقطع لما قالت كده ..
حراااااام عليكم ام الشهيد مش هتقدر تعيش من غير المجمع العلمي ..
مش بذمتكوا حمى الثورة ؟!

( ملحوظة : مفيش رقم 8 ) 

9
مبارك ..
النهاردة فات بالظبط 5 شهور على إعدام مبارك وتحقيق مطلب الثوار ده .. وحتى لما القاضي حكم ببرائته المجلس مسكتش وعمله محاكمة تانية ثورية .. عشان يحقق مطالب الثورة
لو كان مجلس تونسي ولا اي حاجة كان قعد يماطل
.. وياخد بطار الشهداء ..

كفاية ان مبارك قتل من المصريين 864 واحد والجيش خد حقهم ..
المصريين من الثورة لغاية دلوقتي قتلوا من " الجيش " 1063 واحد .. دول مين الي ياخد حقهم ؟!
عشان كده مينفعش ننزل يوم 25 يناير ؟! عشان الجيش معملش ولا جريمة ويمفعش نقابله اسائته بالإحسان ..
المفروض نثور على الناس الي عاوزة تخربها دي .. !!
طب مش بذمتكوا حمى الثورة ؟!
10
طب فرضا ان مؤامرتكوا دي نجحت ..
مين لالي هيمسك البلد لو خلعتوا المجلس العسكري ( حاشا لله )
مين هيمكس البلد ؟!
مفيش حد ..
- مينفعش مجلس الشعب يعمل حكومة برلمانية تعمل انتخابات ( عشان عيب ) .
- مينفعش رئيس المحكمة الدستورية ياخد صلاحيات رئيس ويعمل إنتخابات ( حرام شرعاً ) .
- مينفعش نعمل لجنة من قيادات الأحزاب تقوم بعمل غنتخابات رئاسية ( حاجة مضرة بالصحة ) .
- مينفعش البرادعي او عمرو موسي او العوا يمسك حكومة ويرجع الجيش ثكناته ويعمل هو انتخابات ( عشان كده كفر ) .
- ومينفعش نعمل لجنة مكونة من قضاة مشهود لهم بالنزاهة يعملوا انتخابات ( حرام عليكو البلد هتضيع ) ..

إزاي بقى عاوزين تشيلوا حمى الثورة ومفيش " ولا بديل " ليه ؟!
حرام عليكوا هتخربوا البلد ..
بجد كفاية ..
حرام !
___________________________
دليل آخر على إن المجلس حمى الثورة ..

سبحان الله ، احد التجار وجد بطيخة لونها مغير شوية  فجاءه الإلهام أن يشقها بالسكينة قبل أن يبيعها لأحد جواسيس  6 ابريل  فوجد مكتوب بها الجيش حمى الثورة ، يا جماعة دي قدرة ربنا سبحان الله ، الجيش فعلا حمى الثورة لازم كلنا نأيده :( ( ملحوظة : التاجر ده هو نفسه بتاع البيضة الي مكتوب عليها محمد ، والسمكة الي مكتوب عليها الله نور ، وهو الي  عمل الثورة اشاساا ، وهو الطرف التالت ، و هو الراجل الي  واقف ورا عمر سليمان ، وهو الي كل الجبنة :)

-------------------------------------------------
حبة جد بقى :)
مش عارف اقول ايه غير كل الكلام الرغي ده ، بس في حاجات كتير وقعت مني ، في اسباب كتير مقلتهاش فوق ..

انا في نظرية بحب اقولها اوي .. مش هينفع بيت صاحبه فاسد يعد يحسن اخلاقه ويشتغل وصاحبه فاسد ، يعد ساكت ومستقر وصاحبه فاسد .. البيت ده هيقع .. وهيتهد على دماغ اهالينا كلنا مش اهله بس .. هيتهد على دماغ اهالينا ( يا سلطان ) ..
بس في حاجة يقينية جوايا وهتفضل جوايا ومش هتتغير زي ما ناس كتير فكرت ..
يولع يولع حكم العسكر بجاز *** ...
( *** = وسخ )

عشان بجد حرام الي عملوه في مصر ، انا حاولت ادور على حاجة حلوة عملوها مش لاقي .. كل حاجة لازم مظاهرات وقتل وقرف عشان تتعمل .. لازم ناس تموت وناس تتسحل وناس تتعرى .. لازم دم ..
بعيدا عن كده مفيش ثورة في الدنيا نجحت في 18 يوم بس .. الثورة مخلصتش ..
ومفيش بلد من فجر التاريخ مسكها عساكر الا وخربوها ..
من أول اواخر الفراعة ، وشعوب بابل واشور ، واسبرطة ، وروما .. ومهما طولت الحضارة .. العسكر دايما بيهدوها ..

عشان كده انا مش نازل يوم 25 يناير الي جاي ..
عشان حرام انزل منزلش ..

وبقول لكل دعاة الإستقرار .. طب فوضى فوضى !
لايك وشير وكومنت عشان انا اصلا صوابعي بتوجعني من كتير الكتابة :D
عاوز شير وتويت بغباء ، عاوز شير يهز اركان الفيس وتويتر ..
اتمنى في تدوينتي الجاية نبقى في دولة حرة مبيحكمهاش عسكر .. اتمنى ..

دمتم ،،

--------------------------------
ملحوظة : بالبص في لنك التدوينة هنلاقي إن اللنك :http://www.histiryaa.com/2012/01/25.html
ودي هدية مني للفنان عمرو مصطفى :) انا بحشد للثورة التانية بلنك تدوينة ! O.o

أنا مش نازل يوم 25 ، عشان حرام .. - #مدونة_هستيريا