الخميس، 15 ديسمبر، 2011

إزاي تغلط صح !

كلنا بنغلط :)
دي حاجة حقيقية بما لا يدع مجالا للشك إنها غلط !
مفيش إنسان مبيغلطش .. مفيش حد معصوم

كل واحد لازم يبقى ليه غلطة ..
والإنسان العاقل .. هو الي يغلطها صح =)

أكمل قراءة التدوينة :)
( ملحوظة : ملحق بالتدوينة تطبيق عملي وواجب منزلي ! )
مقدمة لا بد منها ! ( لتزبيط العمل )
 ربنا قال في القرآن : " وعصى آدم ربه فغوى * ثم اجتباه ربه فتاب عليه وهدى "  وده دليل على وقوع المعصية من آدم  وعدم إقراره عليها ، مع توبته إلى ‏الله منها .‏ 
‏ - " قال هذا من عمل الشيطان إنه عدوٌ مضلٌ مبين* قال رب إني ظلمت ‏نفسي فاغفر لي فغفر له إنه هو الغفور الرحيم " 
فموسى – عليه الصلاة والسلام - اعترف ‏بذنبه وطلب المغفرة من ربنا بعد قتله القبطي ، وربنا غفرله ..
- قوله تعالى : ‏" فاستغفر ربه وخر راكعاً وأناب * فغفرنا له ذلك وإن له عندنا لزلفى وحسن مآب " ‏‏ وكانت معصية سيدنا داود هي التسرع في الحكم قبل ما يسمع الطرف الثاني . 
وغير كده نبينا محمد - صلى الله عليه وسلم - ربنا عاتبه في أمور كتيرة ذكرت في القرآن ، منها : 
- قوله تعالى " يا أيها النبي لم تحرم ما أحل الله لك تبتغي ‏مرضات أزواجك والله غفور رحيم " ودي في القصة الشهير مع بعض زوجاته _ صلى الله عليه وسلم _ . 
- وبردو عتاب ربنا للنبي – صلى الله عليه وسلم - في أسرى بدر : وقال: " ما كان لنبي أن يكون له أسرى حتى يثخن في الأرض "

بعد كل ده .. هيجي إنسان عادي جدا ومش شخصية يعني .. يقول أنا مبغلطش ؟!
لو إنت لسا ناوي تفكر كده متكملش قراية :)
-------------------
ارتكاب الأخطاء سمة الشخص النشيط. التقليديون هم السلبيون الذين سيضيعون كل وقتهم ليثبتوا أنهم ليسوا على خطأ *والخاملون كذلك!
-------------------
مكمل معايا ؟! يبقى إنت واثق إنك بتغلط  .. إعتبر دي حقيقة علمية وحاول بقى تغلط صح :)
تخلي غلطك سبب في نجاحك وسعادتك مش حاجة تبوظ حياتك :(

:] إزاي !

اول وأهم حاجة .. لما تغلط متزعلش .. متخليش الحياة تقف .. ومتستناش رد حد .. ومتخليش كلام حد مهما كان محبط وجارح يأثر فيك .. خليك واثق من نفسك .. قول في سرك : أنا وثيق م الفوز
( متقولش بصوت عالي احنا مدونة محترمة XD ) ..


تاني حاجة إعترف بخطأك .. متتكسفش .. كل الناس بتغلط .. مهما كان الغلط جسيم أو كبير ناس كتير هتعمله .. مش إنت بس .. حقيقةً الي مبيغلطوش دول كائنات هلامية خطيرة يجب عدم التعامل معها !!
إغلط يا عم متخليكش هلامي D: وخليك عارف إن الي بيغلط مش مجرم ..

لما تغلط .. حاول تقف مع نفسك وقفة جادة .. فكّر ..
طلع في خيالك القطط الفطسانة من الغلط ده وفكر في كل العواقب الي هتحصله بسببه والمشاكل .. مش عشان تنكره أو تتكسف منه ..
لأ .. عشان مترجعلوش تاني .. وتبقى حاطط في دماغك إن ده مش هيتكرر ..
ويبقى إنت كده خدت درس في الحياة :)

ولما الناس تغلط .. متخليش دورك دور طنط حشرية .. كل وظيفتك إنك تخلي الناس دي حياتها جحيم بسبب الغلطة .. لأ ..  حاول توريهم النص المليان من الكباية .. وتوجههم من غير تجريح أو إهانة للحاجة الصح .. وتبقى فدت الناس دي وفدت نفسك .. لأنك بتتعلم من أخطائهم بردو :)
ومتخليش همك في الحياة أخطاء الآخرين .. متتكلمش على غلط حد .. خليك في حالك م الآخر :\ صلح نفسك .. والتانيين هيقتدوا بيك من غير حاجة لما يلاقوك أحسن ..

خليك مؤمن بالقاعدة الي بتقول : الغلط مش غلط ! .. أه والمصحف !
الغلط مش غلط .. بس الغلط الحقيقي إنك تعدي الغلطة من غير ما تستفيد منها ..
والأوحش من كده .. إنك تغلط نفس الغلطة مرتين :(
كل غلطة في حياتك لو إستغليتها صح .. هتبقى طريق للنجاح والسعادة ..
وخليك فاكر .. لو غلطت مرة مش لازم تيأس ، متنساش إن السهم بيحتاج ترجعه خطوة ورا عشان ينطلق بقوة قدام :)

يعني بص للغلطة إنها بداية النجاح ..
أديسون فشل في إختراع المصباح 100 مرة ..
بس عشان مبصلهوش انه غلط لا يغتفر وحاول تاني نجح في الي هو عاوزه :)


أنا كنت مفكر التدوينة هتبقى اكبر من كده :\ أنا فعلا كتبت كلام كتير بس كلام كتب ممل مش هينفع احطه ..
وكنوع من إرضاء الضمير D:
كل واحد يكتب حاجة غلط هو عملها في كومنت .. وإزاي هو هيستفيد من غلطه ده ومش هيكرره تاني ..
بتفكر إنها حاجة سخيفة ومش هتعملها ؟!
صدقني ده غلط .. هتخسر كتير .. مفيد جدا إنك تكتب غلطك وإزاي هتبعد عنه وتكتب هدفك وإزاي هتحققه .. أي حاجة هتكتبها عقلك الباطن هيحاول بكل قوته ينفذهالك .. :)
أقولك حاجة ؟! بعد ما تكتب الكومنت إكتب كل الحاجات الي انت شايفها غلط في حياتك وعلقها على حيطة اوضتك .. مش هتخسر حاجة .. بس هتكسب كتير لما حياتك تتغير :)

قد تظن أن رأيك بسيط .. ولكنه سيعني لي الكثير ( كومنت ولايك وشير يعني من غير لف ودوران D: )

دمتم ،،

Share/Bookmark
rss