وبمعنى أصح .. أ ح ا !

بعد ما مجلس العار والدمار وكل حاجة وحشة شفتها في حياتي قدر بنجاح يحرق المجمع العلمي الموجود في ميدان التحرير والي بالمناسبة أول مرة نسمع عنه .. وبعد ما قدر بنجاح اكبر منه يقنع حزب الكنبة والناس البسيطة الي كل معلوماتهم جاية من الإعلام المصري العرة .. بعد ما اقتنعوا إن ثوار التحرير هما الي ولعوا فيه عشان هما همج ورايحين يخربوا البلد وخلاص .. وبعد ما حزب الكنبة بقى غض طرفه عن كل الشهداء الي ماتو وعن كل الناس الي انضربت واتسحلت واتعرت وطلع عين أهلها .. لأ وقعد يبرر كمان للمجلس العسكري القتل والسحل وتطليع عين أهل الثوار الي اشرف منهم كلهم ..

أحب أقوله يا مجلس العار .. وأحب أقول كمان للفلول .. ولحسني مبارك مكان ما كان .. ولكل واحد راضي بالي بيحصل .. ولكل واحد لسا هيعبد المجلس العسكري ويقدسه أكتر من كده
بعد ما كتمتها في نفسي كتير أوي أوي أوي أوي يعني .. من أيام ماسبيروا وأحداث 18 نوفمبر ومذبحة محمد محمود .. وكل مليونية كان الناس بيقولوا إنها " بلطجة وتوقيف حال وتعطيل عجلة " .. ومع دم كل شهيد بيموت .. ومع أختي أو أمي إلى إتعرت في ميدان التحرير .. عروها كلاب الواطي الخسيس المشير ..

 أنا حقا أعترض .. و بمعنى أصح .. أ ح ا !

( ملحوظة : الجاهل الي لسا مفكر إن كلمة أ ح ا عيب يطلع من هنا ، والجاهل الي لسا مفكر إن أي خروج عن الحاكم حرام .. برده يطلع من هنا ، والفلول تتطلع من هنا ، وأي قذر موافق على القتل الي بيحصل يطلع من هنا ، والي شايف اني بغلط في الناس عالفاضي يطلع من هنا ، والمؤيد للمجلس العسكري يطلع من هنا ، والي مفكر اني مبعرفش اختلف وقليل الأدب يفكه من قلالة الأدب الي زيي ويطلع من هنا .. مش ناقصة )
( ملحوظة : الباقي يكملوا قراءة التدوينة ! )

أ ح أ إختصار : أنا حقا أعترض ( للأغبياء يعني :)

------------------------------------------

الجندي الي اتعرض لغادة وهو بيحرق المجمع العلمي ، جندي جيش ..

همسك كل نقطة لوحدها .. بداية .. أبدا بالمجمع العلمي
طبعا معظم المصريين مكانوش يعرفوا أي حاجة عن المجمع ده أيام مبارك .. وحتى بعد الثورة ..
ناس كتير جدا وانا منهم أول مرة يعرفوا المجمع العلمي ده بتاع ايه .. يوم ما اتحرق ..
المهم إن هو مؤسسة علمية عريقة جدا ومر على إنشائها أكتر من 200 سنة ..
فيها أكتر من 200 ألف كتاب ومخطوطة وخريطة .. فيه حاجات مهمة جدا جدا ..
خسارة فادحة لمصر .. فادحة أوي يعني .. مصيبة !
الصورة الي فوق دي للجندي الي كان بيضرب غادة وبيشد شعرها ، ودي في حد ذاتها جريمة أكبر من حق المجمع العلمي ..
المهم ان ع الشمال بردو صورته وهو بيحرق المجمع ..
الصورة ملهاش مصدر .. لكن هي جت في جريدة التحرير وللخبراء بس يعني في اختلاف بين الصورة الي ع النت وبين الصورة الي جت في الجريدة .. مش معقول اتفبركت مرتين !

وبالمناسبة عدد التحرير اتسحب بسبب الصورة دي .. لو كانت متفبركة مكنش هيتسحب :\
بغض النظر عن كده ..
حريق المجمع العلمي عار على الجيش الي كان بيأمن الميدان .. أو بيقول إنه راح يأمن الميدان ..
جنود الجيش كانوا واقفين فوق المجمع وهو بيتحرق .. مش في دماغهم خالص يوقفوا الي بيحرق .. مش في دماغهم خالص يضربوه .. همهم الوحيد إزاي يموتوا المتظاهرين ويطلعوا عين أهاليهم .. والبلطجية بيعملوا الي هما عاوزينوا !

عار كبير أوي على ناس بتأمن مكان إنه يتحرق :\
لأ وبعدها يقولوا أصابع خفية وأيدي مستخبية ..
يعني إنت عندك مخابرات عسكرية ومخابرات حربية ومباحث ونيابة ومخبرين وحرس جمهوري وجنود وناس بتحارب بالاسبوع متواصل مبتتعبش .. ومش عارف تتطلع الأصابع الخفية ؟! أ ح ا !

طيب وخراطيم المية الي كانت بتترض على المتظاهرين راحت فين والمجمع بيتحرق ؟! ولا المية كانت قاطعة !!

طيب وأزاي مجمع علمي " محترم " و " عريق " زي ده مفيهوش نظام إطافاء حرائق ؟!
كلها أسئلة ملهاش أجابة عند المجلس .. يقولك خسارة فادحة وخلاص ..

بس الخسارة الأكبر في الواقعة دي كانت في ضماير الإعلاميين .. وفي إحساس المواطنين .. وفي إنسانية مصر !
 الناس نسيت خالص الي ماتو ، نسيت الشهداء ، نسيت السحل ، نسيت العري ، نسيت كل الجرائم وحطت نعي المجمع العلمي بالبونط العريض ..أه طبعا هو خسارة كبيرة بس أي روح مواطن مصري خسارة أكبر منه ملايين المرات ..
ويقولك كتاب وصف مصر المفروض نموت كلنا في سبيله ..
على الأقل في نسخة تانية من كتاب وصف مصر .. بس مفيش نسخة تانية من الشهيد :(
وتأتي المفأجاة الأكبر ..كتاب وصف مصر كنسخة أصلية يعني مش موجودة في المجمع !! ..
موجودة في فرنسا .. ومينفعش نابليون يكون ماضي ع النسخة الي اتحرقت ..
اصلا الكتاب اتعمل بعد ما نابليون مات بحوالي 10 سنين O.o
غير بقى إن المجمع العلمي ده كان مجرد مكتبة صماء .. مخزن للتراث مش بيطور نفسه .. مش بيعمل تراث جديد ..

كان زكي نجيب محمود كتب مقالة إسمها نمل ونحل .. بيتكلم عن إن النمل بياخد الغذاء وبيخزنه ويسيبه زي ما هو .. لكن النحل بياخده يطوره ويعمل منه عسل بيفيد الناس كلها :)
المجمع العلمي للأسف كان أكبر مخزن نمل في العالم كله .. 

------------------------------------------ 
الست الي اتعرت 

انا مش هتكلم عنها ، الصورة بليغه جدا .. صورة راجل وست ستات !
وعجبتني أوي ستاتوس ع الفيس ..

فعلا لأن دي أشرف بنت في مصر ! :)
بس بجد بقول لكل واحد غلّط البنت دي بأي طريقة أو حاول بأي منطق يبرر لجنود الجيش ، لكل واحد معنودش رجولة كافية إنه يغير على بنات بلده ، أ ح أ  !
------------------------------------------
الشهود الي المجلس جابهم 

المجلس الـ " محترم " عرض في المؤتمر بتاعه فيديو لشهادة أطفال :(
بغض النظر عن الناس الي قعدت تقولي آدي الثوار بتوعك ، بغض النظر عن المونتاج الواضح في الفيديو ، وبغض النظر عن إن الإستعانة بشهادة قاصرين إعلاميا حاجة محرمة دوليا ..

فجر المحامي الحقوقي طارق العوضي مدير مركز دولة سيادة القانون مفاجأة من العيار الثقيل في اتصال هاتفي  مع الإعلامية ريم ماجد على برنامج بلدنا بالمصري مشير إلى أن عدد من الأطفال الذين ظهروا في فيديو العسكري الذي عرض على التليفزيون المصري وقال بعضهم أن دار ميريت للنشر كانت توزع خوذات على المتظاهرين تم إلقاء القبض عليهم قبل اندلاع الأحداث في قضية أخرى  يوم الأربعاء الماضي .. وقال العوضي أنه محامي هؤلاء الأطفال مشيرا إلى أن  استغلالهم بهذه الطريقة هو في حد ذاته جريمة يعاقب عليها القانون وأنه سيتقدم غدا ببلاغ للنائب العام ضد المجلس العسكري ووزير الإعلام .

وكان البرنامج قد استضاف الناشط الحقوقي جمال عيد مدير الشبكة العربية لحقوق الإنسان وقال أنه يبدو من خلال الفيديو الذي تم إذاعته أن الأطفال تم تلقينهم هذه الشهادات وأدان استغلال أطفال في تصفية النزاعات السياسية.

 كان اللواء عادل عمارة مساعد وزير الدفاع وعضو المجلس الأعلى للقوات المسلحة قد اتهم المتظاهرين خلال المؤتمر بالاستخدام المفرط للقوة ضد الجيش .. مشيرا إلى أن القوات المسلحة جبلت على الصدق ولا يمكن أن نكذب أبدا .

يعني المجلس بيشتغلنا !! .. أ ح ا !

------------------------------------------ 
ونظرا لأن ودني إحمرت خلاص من حرقان الدم ، نظرا لإني مش عارف احط جرايم ايه ولا ايه ولا ايه ولا ايه ..
شوف الفيديو ده ..
ختاما ،، أنا أحمد عثمان ( مواطن مصري ) أتهم المجلس الأعلى للقوات المسلحة والمشير حسين طنطاوي بتخمة الخيانة العظمى وأطالب بتطبيق أقسى أنواع العقوبة الرادعة لهؤلاء المجرمين :(

وحسبي الله ونعم الوكيل ..

( ملحوظة مهمة جدا : فرق شاسع وكبير بين الجيش ومجنديه الشرفاء الي هما مننا ، وبين المجلس الأعلى والحرس الجمهوري والشرطة العسكرية الي بيقبضوا فلوس من دمنا وبيموتونا في ميدان التحرير وبيهتكوا في عرض مصر ! )

دمتم ،،

وبمعنى أصح .. أ ح ا ! - #مدونة_هستيريا