الجمعة، 26 يوليو، 2013

(26) شوية رباعيات ملهاش دعوة ببعض


أنا الي من خوفه بطل يكون،
وقررت اراقب في صمت وسكون،
وكون الي كان عينه شافت كتير، 
فانا شفت كل الي جوه العيون !
***
وفكرت ابطل افكر ف تهت ..
وكل اما افكر ف شيئ موصلوش .. 
وكل الي فكر وصل شاف وشوفت .. 
بإن الي شافوا اتعموا مفْرحوش ..
***
عرفت إن عشق الجمال المجرد ..
ما كان عمره يشبه جمال البشر ..
ولو شعر شبّه أميرة بوردة ..
مهيخليهاش مرة زي القمر !
***
عرفت إن عشق الجمال المجرد ..
مجرد ما يكمل بيقتل صحابه ..
وإنه عن العشق أصلا تفردّ ..
بإنه بيقفل ف عشاقه بابه !
***
عرفت إن أصل الجمال لما كانت ..
مكانة الجمال في قلوب عاشقيه ..
ما كان لسا فيه المعاني الي هانت ..
ولا سوء ظنون البشر بيه وفيه !
***
وشاعر بيكتب كلام للأغاني،
كلام كل عشق ومودة وأماني،
ويوم لما يعشق مايعرفش يوصف،
مايعرفش يكتب كلام حب تاني!
***
ضحكت علينا حكومتك لبستنا خازوق،
وخدت اخويا وخدتني عشان تجيب حقه،
نامي يا بلدي ف سلام شعبك مهوش هيفوق،
لو كل دم شهيد هيلبسوه في شقه!
***
عواجيز شداد مسعورين قالها الحكيم في ضجر،
طلع الحكيم صادق وإحنا الي مش شايفين،
رحل الي ينفع يكون وفضل شوية غجر،
فيهم حرامي وخروف واتفرقوا الباقيين!
***
انا الي قطع خلفه كتر الغباء،
مجانين بيجروا في عكس السباق، 
يا ريت الغبي كان بيجري لوحده، 
لكنّ الوباء منتشر وبغباء.
***
انا من غباء ابن آدم تعبت، 
أناني ومعاه ف فرقة واحدة لعبت، 
ولما الحكم قام وقف قال خلاص، 
خد الكاس لنفسه وانا لم كسبت.
***
انا الي تعبان من غباء البشر، 
غريب وسط غربا في سكة سفر، 
مسافرين كأن الطريق للأبد، 
وكل الي جاهزين مجوش كام نفر.
***
عجبي على الي عجب مستعجبين من ايه ؟
وهو فيه شيء عجيب لسا وخلافه عليه ؟ 
العلم عرّف جميع الكون وكل غريب،
 بس الخلاف ع الحياة والموت مندريش ليه !
***
الشمس زي القمر واهو كله بيجيب نور 
والفقر زي الغنى وإسم الكريم مستور
عايش ف اوضة هنا زي الي قصره هناك
ما القبر هيلمنا والدنيا دي هتبور

اما الزعيم هيموت اهله هيبكوا عليه،
وهيبكي اهل الي مات ف الزحمة طيب ليه ؟ 
نعمل فروق وسطنا ونطول المسافات، 
مع اننا كلنا ف القبر يوم هنبات!
***
ملعون ابوه الي اختزل حب الوطن في نشيد،
ونسى العطاء والغزل ومحبة العشاق،
يتقال وكاسره الملل والصوت بعيد وشريد،
وبسرعة وعلى عجل وكأننا ف سباق
***
وبيصنعوا فرعون ويقولوا ليه أمجاد..
وهو أصلا مفيش وأهو حظ حلو وجاد..
لو كل عبدين عليهم عبد تالت ساد ..
مين الي راح يتحكم في دولة  الأسياد ؟
***


Share/Bookmark
rss